Aksidenti që ndodhi ditën e dielën në aksin rrugor Shkodër-Velipojë është kthyer në një tragjedi për familjen Preka. Kryefamiljari Edmond Preka së bashku me dy fëmijët e mitur, djalin 9 muajsh dhe vajzën 5 vjeçe humbën jetën menjëherë pas aksidentit, ndërsa sot dhe vajza 10-vjeçare Noemi nuk ia doli dot.
Prej ditës së diel Noemi mbahej me aparatura në gjendje kome edhe pse shëndeti i saj ishte shumë i rënduar.
Nga aksidenti tragjik shpëtoi vetëm mamaja, Evis Preka, e cila ndodhet jashtë rrezikut për jetën dhe është nën kujdesin e mjekëve edhe pse gjendja e saj psikologjike është e rënduar. Nuk dihet ende nëse ajo është lajmëruar për tragjedinë, që bashkëshorti dhe të tre fëmijët kanë humbur jetën.
Vetëm ditën e djeshme u mbajt ceremonia mortore për babain e familjes dhe dy fëmijët që mbetën të vdekur në vend, ndërkohë që pritet në vijim të mbahet edhe ceremonia mortore e Noemi Prekës, të miturës që vetëm pak minuta më parë ndërroi jetë në spital.
