Ish-banorja e “Big Brother VIP 5”, Stelina, ka reaguar së fundmi për ndarjen e shumëpërfolur mes Keijsit dhe Inës, një zhvillim që ka tërhequr vëmendjen e publikut dhe ndjekësve të reality show-t.
E ftuar në emisionin “E Diell”, në rubrikën “Trotuar”, Stelina u përball me pyetje direkte lidhur me deklaratën që Keijsi kishte bërë në Top Albania Radio për fundin e marrëdhënies së tij me Inën. Ajo pranoi se ishte në dijeni të lajmit, por jo sepse e kishte ndjekur vetë në detaje, por për shkak të reagimeve të shumta që kishte marrë në rrjetet sociale.
Sipas saj, lajmi për ndarjen i është dërguar vazhdimisht në Instagram nga ndjekës të ndryshëm, duke e vendosur në një situatë të pakëndshme. “Ma kanë çuar gjysma e Shqipërisë në Instagram. Ka edhe shumë gjëra që lidhen me ta dhe m’i çojnë, dhe kjo gjë më shqetëson deri diku”, u shpreh ajo, duke theksuar se nuk dëshiron të përfshihet në këtë histori.
Stelina shtoi se ka qenë gjithmonë e qartë në daljet e saj publike, duke deklaruar se nuk ka asnjë lidhje me Keijsin dhe jetën e tij personale aktuale. Ajo kërkoi indirekt që ndjekësit të respektojnë këtë distancë dhe të mos e përfshijnë në zhvillime që nuk kanë të bëjnë më me të.
Historia mes Stelinës dhe Keijsit ka qenë një nga më të komentuarat në ekran, që nisi fillimisht në “Përputhen” dhe vijoi më pas brenda shtëpisë së “Big Brother VIP”.
