Rudina Hajdari rrëfeu sot në emsionin “Opinion” momentet e fundit të jetës së babait të saj Azem Hajdari.
Edhe pse e vogël asokohe, ajo kujtoi mbrëmjen kur bashkë me të ëmën shtatzënë po priste të atin të vinte për darkë në shtëpi.
“Në momentin që ne u ndamë ishte diku rreth orës 8- 8 e gjysmë. Donte të shkonte në zyrë të shikonte lajmet. Më mori hopa dhe shkuam drejt zyrës dhe patëm një moment përplasjeje me policinë ku një makinë që kaloi e ndaloi gjatë rrugës. Në momentin që u ndamë po e prisnim në shtëpi se premtoi që do vinte të hante darkë me ne. Momenti që ndodhi ka qenë një moment shumë i vështirë, në të gjithë Tiranën u ndje. Nuk ka njeri që s’më ka thënë që çdo gjë ndaloi atë ditë”.
Mes shumë emocionesh dhe dhimbjeje, Rudina tregoi edhe rutinën e përditshme që bënte i ati çdo mëngjes kur e kthente oborrin e shtëpisë së tij në një sallë takimesh me njerëz që i vinin në shtëpi.
“Zgjoheshe çdo mëngjes dhe ishte një rutinë që e bënte çdo mëngjes dhe pinte kos ose qumësht e merrte në dore e ulej para oborrit ku e prisnin një varg njerëzish. I thërriste, çdo njeri në shtepinë tonë, i thërriste, i takonte dhe bisedonte. Njerëzit ishin shumë të duruar ta takonin për aq minuta sa u kushtonte. Çdo mëngjes ua përkushtonte qytetarëve dhe uleshe në oborin e shtëpisë dhe i takonte një për një”.
Por ndonëse e di se cili ka qenë ai person që ka shkrepur këmbëzën e armës, ajo tregon ende se nuk e kupton përse e bëri, duke qenë se babai i saj ka qenë një ndër politikanët më të dashur se çdo politikan tjetër në Shqipëri:
“Më çudit fakti që ky njeri që e kanë dashur kaq shumë njerëz, ka qenë njeriu që shkërmoqi etapën më të errët komuniste. Si ka mundësi? Pse? Kush ka qenë ai person që e ka dashur këtë ngjarje! Ajo që di unë është që drejtësia e ka shpallur kush ka qenë personi që ka tërhequr këmbëzën dhe kjo është zbardhur, por s’kuptohet përse e kanë bërë, kur Azem Hajdari është dashur më shumë se çdo politikan tjetër”.
“Pa të nuk do isha këtu ku jam e jam krenare që jam e bija e tij dhe përpiqem ta meritoj atë emër se mendoj që bëri të pamundurën për këtë vend”, përfundoi Rudina Hajdari.
/Iconstyle.al
