Kantautori Kujtim Prodani mbylli sytë përgjithmonë mesditën e sotme. Para 1 jave ai njoftoi se ishte infektuar me Covid-19 dhe nuk mundi ta fitonte betejën me virusin tinëzar.
I ndjeri publikoi në fund të dhjetorit një foto nga spitali, në të cilën shfaqej me një maskë oksigjeni në fytyrë.
“Sa miq e sa të afërm na more, o flamë e keqe! (Klinika Shefqet Ndroqi)”, shkruante kantautori në postimin e tij.
Lajmi i ndarjes së tij nga jeta ka ardhur shumë i papritur për të gjithë miqtë e tij, të cilët besonin se Prodani do e fitonte luftën me koronavirusin. Ata kanë ndarë kujtimet e fundit me kantautorin e ndjerë duke shprehur edhe ngushëllimet për familjen e tij.
“Mos o Kujte se nuk po mbajme dot më. Ishe kaq shok i mire sa mbase jo te gjithe te njoften…. Nuk gjej fjale te shkruaj e duart me dridhen fort….. Ta dish edhe ne na e shkaterrove kete fillim viti. Pusho ne paqe o shok i mire prane prinderve te mrekullueshem… Ngushellimet me te sinqerta familjes…. R.I.P”, shkruan Shpëtim Saraçi në Facebook.
Mos o Kujte se nuk po mbajme dot më.
Ishe kaq shok i mire sa mbase jo te gjithe te njoften….
Nuk gjej fjale te shkruaj…Posted by Shpetim Saraci on Wednesday, 6 January 2021
“O Kujtim si keshtu….. E kishim lene te iknim pas shtatedhjetave, me mend ne koke e piano me vete…..Na preve krahët”, shkruan kantautori Gjergj Leka në një status.
Ndërsa këngëtari Redon Makashi është shprehur në një lidhje për “News 24” se lajmin e hidhur e ka mësuar nga Aleksandër Gjoka dhe se nuk e ka besuar në fillim.
“Ishte befasi, as e prisja këtë gjë. Është e pabesueshme, ishte gjithë ai djalë i fortë, i ri, me atë humorin e tij. Është një humbje për artin shqiptar. Ne si miqtë e tij e ndjejmë më tepër se publiku, sepse e kemi pasur mik, shok, koleg.
Ne udhëtonim bashkë, ishte një person që kishte gjithmonë humor. Asnjëherë nuk e kam ndjerë një problem apo hall që ta thoshte, ishte gjithmonë pozitiv. Është komplet e pabesueshme kjo gjë, mendonim se do t’ia hidhte. Kjo qenka një e keqe e madhe. Ne kemi komunikuar bashkë dhe jemi takuar në një ambient të një mikut tonë, ku ai shkonte shpesh për një birrë apo hante diçka”, është shprehur Makashi.
I pari që ndau lajmin e hidhur me publikun ishte Elton Deda.
“Mossss! Pse o vëllai jonë? Çfarë gëzimi kishin bisedat me ty, mirësia jote, zotnillëku jot, qytetari ideal… nuk e besoj dot. Nuk të them dot lamtumirë… por do të të pres për një birrë kur të duash ti”, shkroi Deda në një postim.
