Deklarata absurde e ministrit të Turizmit Blendi Klosi, i cili tha dje se valët e muzikës e përçojnë Covid-in, ka çmendur rrjetin këto 12 orët e fundit.
Klosi duket sikur justifikoi moslejimin e muzikës pas orës 20:00 të mbrëmjes me këtë deklaratë alla-shkencore, por harroi gjithë ato herët kur kolegu i tij Sandër Lleshaj ka shkelur aktin normativ duke lejuar shkeljen dhe abuzimet nga disa resorte e lokale, që kanë luajtur muzikë gjatë gjithë verës edhe pas orës 20:00 (lexo këtu).
Deklarata mbi muzikën dhe virusin ka rënë edhe në veshin e artistëve që po e vuajnë më së shumti mbylljen prej marsit të lokaleve të natës dhe atyre të muzikës live për të cilat është aplikuar gjithmonë arbitrariteti dhe selektivizmi.
Renis Gjoka ka reaguar me ironi ndaj deklaratës së Klosit duke thënë se përpos faktit që po ju mohojnë të drejtën për të jetuar, tani kanë nisur edhe të tallen.
“Mirë që na ngordhi gomari, por s’të lejnë as mizat rehat ?♂️ Mirë që na mohojnë të drejtën për të jetuar, por tallin dhe ingranazhin me ne. Hallall”, shkruan këngëtari në një postim në Facebook.
Me të drejtë Renis Gjoka ngre shqetësimin që ka çdo këngëtar i muzikës live që ka mbetur jo vetëm pa punë, por edhe pa mbështetje e pagë lufte nga qeveria. Pse duhet disa artistë të falimentojnë ose hasin vështirësi ndërkohe që shteti as nuk po i ndihmon vetëm po i godet me rregulla që nuk zbatohen për të gjithë njësoj.
“iconstyle.al” ka raportuar gjithnjë rastet e shkeljes së aktit normativ, nga lokalet e resortet në jug që organizonin mbrëmje me muzikë pas orës 20:00, ndërkohë që policia nuk e vinte ujin në zjarr edhe pse e pranishme (KLIKO).
Dhe në vend që të bëjë diçka për këta artistë që po hasin vështirësi, dalin dhe bëjnë deklarata absurde si ajo e ministrit Klosi, i cili është bërë sot objekt talljeje në mbarë rrjetet sociale:
“As Ministrit të Shëndetësisë nuk i duhet bërë kjo pyetje, por Komitetit të Ekspertëve, që gjykojnë se zonat me muzikë, dhe kjo është e vërtetuar edhe shkencërisht, janë zonat ku virusi përhapet më shumë se në çdo vend tjetër. Kjo pasi valët e muzikës janë ato që përçojnë virusin. Në distancat ku ka valë muzike përhapja e virusit është më e madhe, edhe në ambientet me muzikë sidomos ku përdoret pija alkoolike, njerëzit duke qenë më pranë njëri tjetrit, lëshohen më shumë”, ka deklaruar Klosi.
/Iconstyle
