Këngëtarja e madhe italiane, Milva, e quajtur ndryshe si “Pantera e Goros” ka ndërruar jetë në shtëpinë e saj në Milano. Lajmi i trishtë është konfirmuar për agjencinë “ANSA” nga vajza e artistes, Martina Corgnati. Ajo ka treguar se e ëma kishte pak kohë që vuante nga një sëmundje dhe fatkeqësisht nuk arriti ta fitonte betejën me të. Gjithashtu e bija ka shpjeguar se familja po merret me organizimin e ceremonisë mortore për t’i dhënë lamtumirën e fundit Milva-s.
Milva, pseudonimi i Maria Ilva Biolcati, lindi më 17 korrik 1939, interpretuese historike e këngës italiane, ajo gëzoi suksesin botëror duke marrë pëlqimin e veçantë, si dhe në Itali, gjithashtu në Gjermani. Ajo publikoi albume të shumta në Francë, Japoni, Greqi, Spanjë dhe Amerikën e Jugut.
Gjithashtu bashkëpunoi me kompozitorë dhe muzikantë evropianë si Ennio Morricone në 1965, Francis Lai në 1973, Mikis Theodorakis në 1978 ( Is ich denke u bë albumi më i shitur në Gjermani), Enzo Jannacci në 1980, Vangelis në 1981 dhe 1986, Franco Battiato në 1982 dhe 1986. “La Pantera di Goro” ka interpretuar në La Scala në Milano, në Deutsche Oper në Berlin, në Operën e Parisit , në Royal Albert Hall në Londër dhe në Edinburgh Festival .
Ajo ka marrë nderimet më të larta si Chevalier i Urdhrit Kombëtar të Legjionit të Nderit të Republikës Franceze (Paris, 11 Shtator 2009), Komandant i Urdhrit të Meritës së Republikës Italiane ( Romë, 2 qershor 2007), Oficer i Urdhrit të Meritës së Republikës Federale të Gjermanisë ( Berlin , 2006) dhe Oficer iOrdre des Arts et des Lettres (Paris, 1995).
