Këngëtari i grupit “The Overtones”, Timmy Matley, është ndarë nga jeta në moshën 36-vjeçare.
Në vitin 2016, Matley, i lindur në Irlandë, u diagnostikua me fazën tretë të një forme kanceri të lëkurës, që njihet si melanoma malinje.
Kohët e fundit ai kishte thënë se skanimet dukeshin “pozitive” dhe se kanceri po zhdukej.
Por Timmy nuk i mbijetoi luftës ndaj kancerit. Grupi ku ai bënte pjesë dha në Twitter lajmin e trishtë për vdekjen e tij “të papritur”, të hënën më 9 prill.
Miqtë e grupit të tij shkruan:
“Me trishtim të madh duhet të njoftojmë se miku dhe vëllai ynë i dashur Timmy ka vdekur. E dimë se ky lajm do të jetë po aq zemërthyes për të gjithë ju, ashtu siç është për ne. E vlerësojmë dashurinë dhe mbështetjen tuaj në këtë kohë të vështirë “.
Familja dhe miqtë janë shkatërruar nga lajmi dhe kanë kërkuar privatësi në këtë kohë shumë të vështirë.
Matley së bashku me shokët e grupit Lachie Chapman, Mike Crawshaw, Mark Franks dhe Darren Everest, kanë publikuar pesë albume, katër prej të cilave kanë arritur në 10 vendet e para në Britani. Debutimi i “Good Ol’ Fashioned Love” arriti kulmin në vendin e katërt në mars 2011.
