Gazetari Mustafa Nano vetëm një javë më parë trajtoi në emisionin e tij një temë mjaft delikate të ekraneve shqiptare, siç është ajo e veshjes. Ai zgjodhi të komentonte veshjet e dy moderatorëve të njohura sportive, Bora Zemanit dhe Ilda Bejlerit, të cilat i konsideroi si vulgare dhe të papërshtatshme për ekranin televiziv.
Ndërsa Bora i kaloi në heshtje këto akuza, Ilda zgjodhi të reagonte në mënyrën e saj në çdo emision ku ishte e ftuar ditët e fundit.
“Mua s’më dha asnjë ndjesi sepse me sa di Mustafa Nano nuk është as Chanel as Karl Lagerfeld, për sa kohë një njeri s’ka lidhje fare me atë që flet, janë disa gjëra që kur je pjesë e medias duhet t’i injorosh. Në botën e showbiz ka aq njerëz me të cilët mund të merresh, pa fyer askënd, po besoj se ne si pjesë e sportit dhe medias nuk krahasohemi fare me disa fusha të tjera”, u shpreh Ilda së fundmi në një intervistë ne lidhje me komentet e Nanos.
Ky debat është rikthyer sërish mbrëmjen e djeshme në emisionin “Zonë e Lirë”, i cili vijoi debatin duke diskutuar për etikën e veshjes dhe duke u ndalur edhe te fenomeni Bejleri.
“Mua më bezdis vulgariteti. Unë mendoj se një studioje të atillë televizive nuk i shkon ajo veshje. Duket sikur ka pasur një polemikë mes meje dhe asaj, por unë e kam me fenomenin. Harrojeni emrin e Ilda Bejlerit, tani është më vulgar se sa veshja që kishte. Të flasim për fenomenin. Vetëm përgjigjja që ka dhënë ajo, ne s’duhet t’i përmendim as emrin. Mua e fundit gjë që më shkon në mendje është të polemizoj me një qenie të atillë. Unë nuk isha përgatitur për këto gjëra. Unë jam marrë me dukurinë. Ajo është një qenie aq vulgare, sa unë nuk kam parë. Pas reagimit të saj, mua më vinte turp që i kisha përmendur emrin. Si mund t’i referohesh një njeriu të tillë, tani unë po merrem me të, kam rënën në grackë. Unë e gjykova në debatin estetik, nuk u mora me të, por me veshjen”, u shpreh Mustafa Nano duke sqaruar se nuk ka asnjë gjë me Ildën, por me fenomenin që ajo përfaqëson.
Jo vetëm kaq po Mustafa Nano i kërkoi falje publike Ildës, nëse ai mund të kishte thënë diçka më shumë se sa duhet në emisionin e tij.
“Unë nuk e prisja të përmendje emrin e Ilda Bejlerit. Unë nuk kam punë me të, s’më lidh asgjë me të dhe as nuk dua ta njoh. Unë i kërkoj falje, nëse më ka dalë nga goja ndonjë gjë që nuk duhet”, tha Nano.
