Nëse ende nuk i keni rezervuar pushimet dhe jeni në dilemë se ku mund t’i kaloni, atëherë jeni në vendin e duhur!
Ne sot do t’ju zbulojmë se cilat janë ato gjiret, plazhet apo kepet që jo gjithkush i di, por që janë një mrekulli më vete në mbarë bregdetin shqiptar!
Kep Merli
E nisim fillimisht me një nga plazhet më të famshëm të momentit! Mund të keni parë këdo që bën hashtag #kepmerli në Instagram dhe me siguri jeni bërë kuriozë! Kep Merli në fakt ndodhet në Ksamil dhe është një ndër resortet më luksoze shqiptare! Vendndodhja e rezidencave atje e bën një nga pikat më ekskluzive dhe sigurisht që vizitohet nga personazhe të famshme! Çmimet le të themi se janë pak të kripura! Për të mos përmendur që ish-presidenti Nicolas Sarcozy dhe Carla Bruni pushuan aty gjatë vizitës së tyre në Shqipëri pak ditë më parë!
Gjiri i Krorëzit!
Një ndër bukuritë natyrore jo edhe aq të shkelura nga këmba e njeriut në Sarandë! Kjo për vetë faktin se aty nuk mund të shkosh dot me rrugë tokësore, por vetëm përmes detit. Uji i kristaltë me rërën e bardhë të kujton plazhet e Maldives, vetëm se mos harroni të merrni bukë dhe ujë me vete, pasi aty nuk gjen dyqane apo restorante të hapur në çdo periudhë!
Gjiret përrallore të Karaburunit
Gjiri i Dafinës është një prej bukurive natyrore më të veçanta që gjen në gadishullin e Karaburunit. Në morinë e gjireve detare që ka ky gadishull renditim, gjirin e Dafinës, shpella e Haxhi Aliut, Gjiri i Ariut, i Shën Andreut etj. Këto gjire të bukura mund të vizitohen përmes udhëtimeve me mjete lundruese, pasi pozicioni strategjik e bën të vështirë udhëtimin atje.
Gjiri i Dafinës
Shpella e ariut
Gjiri i Shën Andreut
Gjiri Skaloma Beget
Gjiri i Nexhajve
Ishujt e Tongos dhe Stillos
Ishulli i Tongos dhe i Stillos janë dy ishuj të vegjël pranë njëri-tjetrit që ndodhen në skajin më jugor të vendit, në Konispol! Ishulli i Tongos është shkëmbor dhe ujërat e kristalta janë të pasura me gjallesa nënujore! Ndodhet shumë pranë Greqisë, rreth 300 m në Detin Jon dhe është i pabanuar!
Rana e Hedhun
Vetëm 3-4 kilometra larg Shëngjinit mund të gjeni një ndër plazhet më të veçanta të quajtura Rana e Hedhun, ku mund të shijoni bukuritë natyrore dhe plazhin e pastër! Ky plazh është lehtësisht i aksesueshëm përmes rrugëve tokësore dhe ka edhe restorante ku mund të shijoni ushqimin e detit! Ah mos harrojmë, kap edhe WIFI!
Plazhi i Karpenit
Në bregdetin Adriatik të zonës së Kavajës, ndodhet plazhi i Karpenit nga ku, në ditë me qiell të pastër shikon ndërtesat shumëkatëshe në brigjet përkarshi, prej Durrësit në Golem. Nga Tirana në Karpen duhet të përshkosh 60 km. Ky plazh është ndër të preferuarit e turistëve të huaj, me ndërtime të pakta dhe me bunkerët e kohës së luftës që tani shërbejnë vetëm për të bërë hije!
*Shënim: Nëse edhe ti njeh ndonjë plazh të fshehur diku në bregdetin shqiptar, ndaje me ne se nuk i themi njeriu! 🙂
/Iconstyle.al
