Nëse keni planifikuar që këtë fundjavë t’ia dedikoni plazhit, atëherë qetësohuni pasi moti do të jetë në favorin tuaj.
Edhe kjo fundjavë do të jetë me temperatura të larta të cilat do të vijojnë të jenë tipike për muajin më të nxehtë të vitit.
Sipas Meteoalb, temperaturat kanë filluar të rriten që nga dita e premte e do të vazhdojnë edhe gjatë fundjavës deri të hënën kur do të mbeten pothuajse konstante. E shtuna dhe e diela do të kenë mot të kthjellët dhe të nxehtë. Temperaturat kulmojnë ditën e diel deri në 38 gradë C.
Ditët vijuese të javës mbeten në ndikimin e motit të kthjellët dhe temperaturave të larta. Herë pas here do të shfaqen kalime vranësirash të lehta, më të dukshme në zonat lindore.
Dita e martë sjell rënie të temperaturave, që do të jetë më e ndjeshme të mërkurën. Në këto vlera termike mbetemi deri fundjavën e fundit të korrikut kur sërish do të ketë rritje të temperaturave, që pritet të vijojë dhe ditët e para të gushtit.
