Daja i Evës 14 vjeçe dhe Endrit 12 vjeç të cilët ndodhen prej rreth 7 vitesh në zonën e luftës në Siri, kërkon ndihmë për të rikthyer nipërit e tij.
Dy fëmijët u larguan me të atin Shkëlzen Dumani i cili gënjeu të shoqen, mori autorizimin e saj dhe bashkë me fëmijët iu bashkua luftës së shtetit islamik.
Dumani vdiq gjatë luftimeve të grupit islamik, dhe pak ditë më parë ndërroi jetë edhe nëna e tij, Mentije Dumani, 73-vjeçare.
Trupi i saj ndodhet në Siri, ndërsa Xhetan Ndregjoni thotë për Fax News, se fëmijët janë më të rrezikuar se kurrë. Mes të tjerash, ai theksoi se ka 6 vjet që shteti thotë se po punon për rikthimin e fëmijëve në atdhe, por deri më tani asgjë nuk është bërë.
“Nuk kemi lënë njeri pa telefonuar, deri te këshilltari i kryeministrit për antiterrorin, nuk kemi lënë njeri, i kemi shkruajtur kryeministrit, na ka thënë po merremi, po merremi, dhe asgjë nuk është bërë. Ata fëmijë mund të jenë subjekt i çdo gjëje të keqe. Ata fëmijë i ka rrëmbyer babai i vetë, gënjeu motrën time dhe shkoi drejt Sirisë. Mentija shkoi me shpresën se do ta bindte djalin që të kthehej. Pas vdekjes së Mentijes kam komunikuar vetëm një ditë me fëmijët, vajza më lajmëroi për vdekjen e gjyshërve. Më kanë thënë se kthimi i fëmijëve mund të bëhet vetëm përmes shtetit shqiptar, nuk na jepen dot ne si familjarë, nuk mund të bëjmë asgjë. Sa ishte Mentija gjallë kishim një lloj shprese, tashmë thirrja jonë është vetëm prej shtetit, koha nuk pret më, nuk kam fjalë tjetër. Ata fëmijë tani mund të jenë objekt i çdo të keqe, nuk dimë se çfarë ndodh me ta”, u shpreh daja i dy fëmijëve Dumani.
Me lot në sy ai tregoi se sa shumë mungojnë dy nipat dhe akoma më shumë motrës së tij që ka rreth 7 vjet që nuk i ka parë dy të vegjëli.
“Baballarët e tyer janë në burg. Pjesa dërrmuese janë vrarë. Organizata ndërkombëtare nuk po i trajtojnë. Mos pyet si po e përballon, nuk e di si e gjen dita e nesërme. Kam plot 7 vjet që po shpreson për to dhe nuk arrij dot që ‘tju jap një përqafim. U bëj thirrje të gjithë organizamve ndërkombëtare që ti rikthejnë. Ka ikur kur ka qenë në plasë të 7-të. Çdo komunikim me to është thirrje se çfarë po bën shteti me ne. dhe na thonë o daja na thuaj a nuk po merret shteti me ne dhe unë nuk di çfarë që t’ju them. Jam gati të kontribuoj me çfarë më kërkohet. Në çdo derë ku kemi kontaktuar e vetmja rrugë është mënyra institucionale dhe çdo institucion ka shprehur gatishmëri, por nuk kemi parë asgjë”, tha Dumani.
Në videon e mëposhtme, Xhetan Ndregjoni arrin të shquajë Evën, mbesën e tij, e cila ndodhet në kampin Al Hawl:
Pak muaj më parë Ndregjoni tha se Afrim Berisha arriti të kontaktonte me Alvinin, nëpërmjet mbesës së tij, Evës. “Ishte mbesa ajo që gjeti Alvinin. Informoi të atin nëpërmjet meje që ai është gjallë”.
Ai shpreson që edhe dy nipërit e tij të kenë fatin e Alvinit, i cili tani është pranë familjes.
Referuar edhe një regjistri te mbajtur nga vetë gratë e atij kampi, në këtë kamp ndodhen rreth 80 shqiptare nga Shqipëria, Kosova dhe Maqedonia. Më shumë se gjysma e tyre janë fëmijë.
