Pas dështimeve në masë për t’iu ardhur në mbrojtje të qytetarëve ndaj abuzimeve me ofertat të operatorëve celularë në vend, Autoriteti i Komunikimeve Elektronike dhe Postare, AKEP, më në fund po vepron sipas përgjegjësive që ka.
Sipas një drafti të fundit, telefonatat e marketimit të produkteve apo të shitjes së tyre, që në shumicën e rasteve kthehen në shqetësim për klientët, duke telefonuar vend e pavend, do të marrin fund njëherë e mirë.
AKEP ka publikuar për këshillim publik një draft të Rregullores Për “Mbrojtjen e konsumatorëve dhe përdoruesve të shërbimeve të komunikimeve elektronike publike” ku në një prej anekseve sanksionohet edhe mënyra sesi do funksionojë regjistri “Mos më telefono”.
Kjo do të thotë se të gjitha numrat që regjistrohen në këtë regjistër, nuk do të telefonohen për qëllime marketingu.
“Operatorët dhe administratori i regjistrit kombëtar Do Not Call Me kanë detyrimin që të sigurojë integritetin, saktësinë, përditësimin dhe ruajtjen e konfidencialitetit të informacionit të pajtimtarëve sipas legjislacionit në fuqi, përfshirë Ligjin 9918/2008, Ligji Nr.9887, datë 10.03.2008 “Për mbrojtjen e të dhënave personale”, i ndryshuar, si dhe akteve të nxjerra në plotësim të tyre dhe/ose për këtë qëllim” vlerëson AKEP.
Kompanitë afat deri në 1 mars 2021
Sipas pikës 1 thuhet se çdo sipërmarrës ofrues i shërbimit publik telefonik që alokon numra për pajtimtarët përdorues fundorë të shërbimit publik telefonik, ka detyrim që të sigurojë për pajtimtarët e tij që të kenë të drejtën, pa pagesë, që të përfshihen në Numëratorin Telefonik të Përgjithshëm, të informohen për qëllimin e numëratorit dhe funksionet e disponueshme të kërkimit të informacionit në numërator si dhe në Regjistrin “Mos më Telefono” (Do Not Call Me), për të mos marrë thirrje/komunikime të pakërkuara tregtare.
Të njëjtët sipërmarrës kanë detyrime që duke filluar nga 1 mars 2021 në Përmbledhjen e Kontratës, të përfshijë dhe zgjedhjen e pajtimtarit për përfshirje në Numëratorin Telefonik të Përgjithshëm dhe zgjedhjen e pajtimtarit për thirrjet/komunikimet pa kërkesë, apo për përfshirje në Regjistrin “Mos më Telefono”.
Për përfshirjen ose jo të pajtimtarit në Regjistrin “Mos më Telefono”, Përmbledhja e Kontratës duhet të përmbajë në mënyrë të qartë alternativën e mëposhtme të zgjedhjes: Dëshironi që në numrin tuaj të telefonit të merrni thirrje/komunikime pa kërkesë nga kompani marketing në numrin tuaj të telefonit?: PO/JO” thuhet në rregullore.
Ky dokument i jep të drejtë pajtimtarit të ndryshojë kushtet për këtë aspekt në çdo kohë pra nëse merr të vendosë të mos marrë dhe e kundërta. Kjo bëhet duke u paraqitur në pikat e shitjes.
“Çdo sipërmarrës ofrues i shërbimit publik telefonik që alokon numra për pajtimtarët përdorues fundorë të shërbimit publik telefonik, ka detyrim të mbajë një Bazë të Dhënash të Pajtimtarëve, në formatin e duhur elektronik, dhe që përmban të paktën informacionin dhe fushat e mëposhtme:
1) Numri i telefonit të pajtimtarit; 2) Emri, mbiemri i pajtimtarit/emri i biznesit; 3) ID e pajtimtarit: Numri Unik Personal/NIPT; 4) Adresa e pajtimtarit; 5) Zgjedhja e pajtimtarit për numëratorin telefonik të përgjithshëm: 1. “Jo”, 2. “Po” përfshihen në fushë të veçantë elementet që pajtimtari dëshiron të publikohen. 6) Zgjedhja e pajtimtarit për thirrjet/komunikimet pa kërkesë, pra a dëshiron të jetë pjese e Regjistrit Do Not Call Me (Mos më Merr në Telefon): 1. “Jo”, 2. “Po”” thuhet në rregullore.
AKEP dhe Autoriteti i Konkurrencës mbyllin sytë ndaj shkeljeve
Është për të ardhur keq, që qytetari shqiptar është i pambrojtur, qoftë nga AKEP, qoftë nga Autoriteti i Konkurrencës., si rregullatori i tregjeve të telefonisë në vend, ndonëse ka premtuar shpeshherë se do të marrë masa për uljen e tarifave celulare në vend, objektivat e tij rrallëherë kanë gjetur zbatim deri më tani në vend.
Shpesh herë kemi bërë krahasim mes paketave të operatorëve celularë në Shqipëri me ato në Itali, që kanë një diferencë 5 fish në çmim, dhe për më tepër kur e mendon që jemi një vend që nuk krahasohet me Italinë, në aspektin ekonomik apo të zhvillimit.
Një rol të rëndësishëm për monitorimin e këtyre paketave duhet të luajë Autoriteti i Konkurrencës, i cili, herën e fundit që operatorët telefonikë rritën çmimet, reagoi duke hapur hetimet vetëm kur çështja u bë publike në media.
Shpresojmë që të marret situata në kontroll edhe me telefonatat e marketingut, për të ruajtur e konfidencialitetin e çdo pajtimtari.
Përshtatur nga Monitor/Iconstyle.al
