“Albanian Woman in Audiovisual” kanë organizuar një fushatë kundër ngacmimeve seksuale.
“Mos hesht!”, “Mos e tolero!”, “Fol!”, ishin vetëm disa nga mesazhet që janë përcjellë në çelje të kësaj fushate e cila synon të ndërgjegjësojë të rinj dhe të reja që të denoncojnë rastet e ngacmimeve seksuale që hasin në transport dhe hapësira publike.
Në këtë kuadër në disa zona kyçe të Tiranës janë vendosur postera si dhe mbishkrime me mesazhe dhe numra telefoni në autobusët e linjës së Kamzës që do të qëndrojnë për 1 muaj.
“Përpara një viti ka dalë një sondazh i cili thotë që në Shqipëri gratë dhe vajzat ndihen në masën 78% të pasigurta në transportin publik, ndërkohë që 31% janë ngacmuar seksualisht në vendin e punës. Ne mendojmë që me këto shifra, të cilat janë alarmante ka nevojë për një adresim të menjëhershëm në pikëpamjen e ndërgjegjësimit të komunitetit, i cili është dëshmitar i ngacmimeve seksuale që ndodhin në mënyrë të përditshme, në mënyrë të vazhdueshme ndaj grave dhe vajzave dhe nuk reagon”, shprehet Sulçe.
“Dhe kjo vjen ngaqë viktimat, ose të mbijetuarat paragjykohen, ju vjen turp dhe në më të shumtën e rasteve gjykohen se e kanë ato fajin se janë ngacmuar”, përfundon Sulçe.
Kjo nismë ka marrë mbështetjen e linjës së transportit urban të Kamzës fillimisht, me qëllimin për tu shtrirë edhe në linja të tjera të transportit publik.
Dashnor Mema nga shoqata e Transportit Urban dhe Interurban shprehet se punonjësit e transportit urban janë të njohur me praktikat që duhet të ndiqen në rast të ngacmimeve seksuale në transportin urban.
“Duke qenë transporti publik vend specifik me një numër të lartë udhëtarësh, natyrisht që lind nevoja që të jemi më të kujdesshëm dhe eficient në punën tonë. Ajo që ne bëjmë zakonisht në raste të tilla kur kemi edhe ngacmime seksuale, që janë edhe fenomene shumë të ralla të denoncuara për fat të keq. E para është që njoftohet fatorinoja, fatorino njofton shoferin. Mbyllen dyert e autobusit, në moment njoftohet edhe grupi i gatshëm nëpërmjet radios nga ana e shoferit. Maksimumi që janë prezent, është 3-5 minuta kontrollorët, kurse grupi i gatshëm. 5-10 minuta, në varësi të stacionit”, shpjegon Mema për Citizens Channel.
Të pranishëm në hapjen e fushatës kundër ngacmimeve seksuale ishin edhe përfaqësues të pushtetit lokal e qendror, të cilët shprehën nevojën për më shumë punë për parandalimin e këtij fenomeni.
Do të doja të jepja një mesazh sidomos për vajzat e mitura apo ato që janë në moshë ku ende pasiguritë e moshës janë të mëdha, që nëse denonconi dhe nëse nuk gjeni përgjigje kërkojeni kudo një përgjigje. Nga ana jonë ka zero tolerancë ndaj çdo oficeri policie që nuk iu përgjigjet ju, zero tolerancë ndaj çdo pseudo zyrtari që nuk merr denoncimin tuaj, zero tolerancë kur vjen puna për denoncimin e ngacmimit seksual”,-deklaroi Romina Kuko, zëvendës Ministre e Brendshme.
Sipas përfaqësuesve ndërkombëtare, ky fenomen shkel të drejtën parësore për t’u ndjerë të sigurt, ndaj duhet të marrë vëmendjen e duhur.
“Përvojat e burrave dhe grave që përdorin transportin publik dhe autobusët dhe mënyrat e tjera të transportit të transportit ndryshojnë shumë, veçanërisht në lidhje me sigurinë fizike siç kemi dëgjuar. Komentet e pakëndshme që shqetësojnë, vërejtjet dhe kërcënimet janë forma të dhunës dhe ngacmimit dhe kanë implikime serioze për gratë. Klima e frikës mund të bëhet barrierë për lëvizjen dhe normalizimi i kësaj sjelljeje, nëse ka një normalizim në Shqipëri është shqetësues, është problem i shoqërisë”,-deklaroi Niklas Ström, ambasadori i Suedisë në Shqipëri.
Monica Merino, përfaqësuese e UNDP në Shqipëri theksoi edhe njëherë nevojën për të folur e denoncuar çdo situatë të ngacmimit seksual, të përjetuar veçanërisht nga vajzat dhe gratë.
“Fol! Ngrihu! Mos prek! Synimi i ngacmimeve seksuale në transportin publik. Transporti publik është një komponent thelbësor i rutinës së përditshme të njerëzve. Fatkeqësisht për shumë individë, veçanërisht gratë dhe vajzat, transporti publik është i pasigurtë, për shkak të ngacmimeve seksuale. Ngacmimi seksual shkel kufijtë personalë në të drejtat e tyre për t’u ndjerë të sigurta. Ndikon tek individi përtej momentit të ngacmimit, ndikon në mirëqenien emocionale dhe psikologjike”,- u shpreh Monica Merino.
Numrat 129, 116 111 dhe 116 117 u afishuan në mjetet e transportit publik, duke nxitur kësisoj denoncimin e rasteve.
Kjo ngjarje përkon me javën që përfundon me 8-Marsin, ditën ndërkombëtare të grave.
Shkrimi nga Citizens Channel
