Një ngjarje e rëndë me pasojë vdekjen ka tronditur qytetin e Beratit, ku një debat i çastit për një kalë është kthyer në krim. Viktimë mbeti 45-vjeçari Keli Hoxha, i cili u godit për vdekje me thikë në ambientet pranë kalasë së qytetit.
Sipas burimeve zyrtare, autori i dyshuar është 63-vjeçari Kristo Mema, i njohur edhe me emrin Kontandin Hoxha. Sipas dëshmisë së tij në polici, gjithçka nisi kur ai pa viktimën duke prekur kalin e tij. “Mos e prek kalin, se është i acaruar sot”, i kishte thënë Mema, duke pretenduar se kafsha ishte në gjendje të keqe dhe mund të reagonte keq. Por pas këtij paralajmërimi, mes tyre shpërtheu një debat i ashpër.
Në dëshminë e dhënë për hetuesit, 63-vjeçari ka rrëfyer se pas disa fjalëve fyese nga viktima, ai humbi kontrollin dhe, në gjaknxehtësi, nxori thikën që mbante fshehur në samarin e kalit, duke e qëlluar për vdekje. Pas krimit, Mema është larguar në banesë, ka lidhur kalin në kasolle dhe më pas është fshehur në një nga shpellat e kalasë, ku u kërkua nga policia për disa orë.
Familjarët e Kelit Hoxha, nga ana tjetër, rrëfejnë një histori ndryshe: sipas tyre, viktima nuk e ka ofenduar autorin, por vetëm i është përgjigjur qetësisht se “s’ka asgjë të keqe” ta prekësh kalin. Një debat i vogël, një moment i humbur arsyetimi dhe një jetë që nuk kthehet më.
