Babai i Meghan Markle nuk do të marrë pjesë në ceremoninë martesore të vajzës së tij me Princin Harry që mbahet pas tri ditëve, sepse do t’i nënshtrohet një operacioni në zemër.
Thomas Markle, 73 vjeç, i cili jeton në Meksikë, do të bëjë një ndërhyrje të vështirë në zemër që synon pastrimin e arterieve të bllokuara dhe vendosjen e unazës.
Mjekët thonë se sulmi në zemër u shkaktua pasi djali i tij Thomas Jr, shkroi një letër dhe e publikoi në media ku i kërkonte Princit Harry të mos martohej me motrën e tij Meghan.
“Sa më shumë që kalon koha drejt martesës suaj mbretërore, aq më shumë e qartë bëhet se ky është gabimi më i madh në historinë e martesave mbretërore”, shkroi Thomas në letrën, të cilën e ndau me “InTouch”.
“Meghan Markle nuk është padyshim gruaja e duhur për ju”, vijon letra.
Lajmi për ndërhyrjen kirurgjikale erdhi papritur në mesin e një numri të madh spekulimeve se Z. Markle do ta linte në baltë vajzën dhe nuk do të merrte pjesë në martesën mbretërore të së shtunës në Windsor Castle në Berkshire.
Dy ditë më parë, Thomas Markle hoqi dorë nga dasma e së bijës, pas akuzave se bashkëpunoi me një agjenci fotografish në Los Anxhelos dhe shiti imazhe të përgatitjeve për ditën e dasmës.
Dhe teksa Meghan dukej se e kishte bindur babanë e saj që të ndryshonte mendje për ta shoqëruar drejt altarit, gjendja e tij shëndetësore u përkeqësua.
Thomas përjetoi një atak në zemër 7 ditë më parë. 73-vjeçari tha se ish-bashkëshortja e tij Doria Ragland duhet ta shoqërojë vajzën në altar dhe se ajo është e vetmja që mund ta bëjë mirë këtë detyrë.
