Tashmë është zyrtare: Marica Pellegrinelli dhe Eros Ramazzotti i kanë dhënë fund martesës.
Pas disa javësh plot thashetheme, çifti konfirmoi atë që fansat kishin frikë të dëgjonin: Pas 10 vjetësh mes tyre nuk ka më dashuri!
Mediat italiane shkruajnë se ajo që shkaktoi ftohjen mes këngëtarit Eros dhe Marica-s, ishte distanca.
“Ai gjithnjë udhëton nëpër botë, i zënë me turne dhe koncerte, ajo është një modele në karrierë, një figurë e shumë markave të njohura të modës, e zhytur në punë”.
Ata që i njohin konfirmojnë se Eros dhe Marica kalonin shumë pak momente së bashku. As fëmijët Raffaella Maria dhe Tullio Gabrio, nuk do të kishin arritur t’i mbanin së bashku. Gjithmonë në rrugë dhe shumë kilometra larg njëri-tjetrit, 56-vjeçari dhe 31-vjeçarja i dhanë fund marrëdhënies së tyre.
Për të njoftuar divorcin ata publikuan një deklaratë zyrtare.
“Kanë qenë 10 vite të mrekullueshme, së bashku kemi ndërtuar një familje të bukur dhe ishim shumë të lumtur në një mënyrë të paharrueshme. Ne jemi të qetë në zgjedhjen tonë të përbashkët dhe do të vazhdojmë të takohemi me njëri-tjetrin shpesh. Respekti dhe nderimi i ndërsjellë mbetet i pandryshuar. Ne ju lutemi, veçanërisht për qetësinë e fëmijëve tanë, të respektoni privatësinë tonë”.
Eros dhe Marica u njohën në vitin 2009, në skenën e Wind Music Awards, ku modelja nga Bergamo i dha Eros një çmim. Më pas u bënë prindër dhe në vitin 2014 u martuan, duke kurorëzuar dashurinë e tyre me lindjen e dy fëmijëve.
Për Ramazzottin, i cili gjithmonë kishte deklaruar një dashuri të çmendur për të, kjo është martesa e dytë që përfundoi, pas asaj me Michelle Hunziker, nga e cila ka një vajzë që quhet Aurora.
