Bashkëshortja e Kryetarit të Kuvendit, Monika Kryemadhi ka qenë e ftuar në emisionin e mëngjesit, në News 24, “Vila 24”, ku ka rrëfyer detaje të pathëna më parë mbi jetën jashtë politikës, familjes dhe marrëdhënien e saj me Ilir Metën.
E pyetur për fillimet e njohjes me të, ajo u shpreh: “ Mua Iliri nuk më ka pëlqyer se është maskilist, i pëlqen të ketë shoqëri me burra, s’më pëlqen kjo gjë se nuk e bën të jetë xhentil, si për shembull të të hapë derën e makinës apo të të mbajë pallton”, tregoi ajo.
Ndër të tjera, deputetja e LSI-së ka treguar për gjërat që gjithmonë ia kritikon bashkëshortit të saj, të cilat lidhen me rutinën ditore të çiftit.
“Kur lan dhëmbët ai e bën lavamanin shumë pis, televizorin nuk e kontrollon dot, do vetëm një telekomandë, as shampot s’i ble dot, do që të gjitha këto t’ia bëj unë”, vazhdoi Monika.
Duket se Kryetari i Kuvendit nuk është aspak tip dhuratash, dhe këtë e pohon vetë Kryemadhi, e cila tregon se në ditëlindjen e saj të 36-të ishte e vetmja herë kur kishte marrë 136 trëndafila prej tij në 23 vite martesë. “Kur më ka sjellë lulet, kam qëndruar 2 javë pa gjumë.”
E pyetur në fund për momentin e saj më të vështirë ajo tregon se ka qenë aksidenti, që Meta bëri në Dibër në zgjedhjet e 2005, ku ai përfundoi me krahë të thyer. Monika shton që kurrë nuk u mësua se kush ishte personi që i doli përpara, pasi kjo çështje nuk u zbardh asnjëherë.
