Shtatzënia e Elona Duros ishte një e papritur për publikun. Pak e dinin që ajo ishte e dashuruar dhe kishte një partner, edhe pse në profilin e moderatores së qeshur, Lorenc Goga është mjaftueshëm i pranishëm.
Në një intervistë për Palomën ajo ka treguar gjithë historinë që nga fillimi. Ka pasur pjesë që kanë rrjedhur ndryshe nga ç’e kishte menduar, por ka pasur dhe të tjera që i kanë planifikuar, siç ishte një fëmijë. Edhe pse janë bashkë prej vetëm një viti, Elona dhe Lorenci, ndryshe dhe nga ç’mund të imagjinohet, e kishin planifikuar një fëmijë dhe u lumturuan shumë kur mësuan që do e kishin.
Ishte forma klasike, një test shtatzënie në mëngjes dhe vrapi për te shtrati për t’i thënë partnerit lajmin e bukur…i cili mbeti paksa i habitur si kishte ndodhur kaq shpejt për t’iu dorëzuar më pas të dyve gëzimit…
Është një histori që duket sikur ka rendur shumë shpejt, por e rëndësishme është që të dy ndihen mirë. As Elona nuk e kishte menduar që do të shkonte kështu. Ata janë njohur në një klub dhe që nga ajo natë kanë qenë gjithmonë bashkë…Tani, siç tregon ajo për “Palomën”, i kujtohet sesi dikur u thoshte vajzave të tjera që nuk gjendet mashkulli në klub, por ja që mund të ndodhë edhe kështu. Nuk ishte ajo skena e mashkullit të krekosur, që tenton të bëjë për vete vajzën duke shfaqur pasurinë dhe pozitën e tij, ishte thjesht një dashuri e shpejtë.
“Është e çuditshme ajo që ndodh me njeriun. Unë kam qenë një paragjykuese që u thosha vajzave që s’do ta gjejnë kurrë një mashkull në një klub, kur unë vetë e njoha në një ambient të tillë dhe u shndërrua në burrin tim. Madje as nuk nisi nga këta djemtë bukuroshë që kanë një pozicion të mirë, d.m.th. ne u dashuruam aq shpejt sa më vonë e kemi marrë vesh se çfarë bënte secili prej nesh. Lërini gjërat të vijnë kur duan të vijnë, pa formula dhe receta të gatshme”, ka thënë Elona Duro.
