Xhesika Berberi është një nga modelet shqiptare që po ndjek ëndrrën amerikane dhe po kërkon suksesin ndërkombëtar. Bukuroshja shqiptare është transferuar prej kohësh në Shtetet e Bashkuara, ku po ndjek karrierën e saj si modele së bashku me miken e saj të ngushtë, Adrola Dushi.
Pas sfilatës së Adrolës për stilistin e njohur LaQuan Smith, një tjetër sfilatë që nuk duhet humbur është ajo e modeles Xhesika Berberi. Kjo e fundit sfiloi për Lavanya Coodly koleksioni vjeshtë/dimër 2017 në shfaqjen Nolcha, Java e Modës në New York.
Bukuroshja bionde ishte veshur me një palë pantallona të shkurtra të shndritshme dhe një crop-top në po të njëjtën ngjyrë. Veshja kompletohej me një bluzë tyl të hollë sipër dhe një palë çizme të gjata mbi gju, në ngjyrë të zezë. Xhesika dukej mahnitëse në pasarelë, me një palë vathë me gurë që shkëlqenin dhe nxirrnin në pah sytë e saj me ngjyrë. Makijazhi i të gjitha modeleve ishte i thjeshtë me një penel dhe buzët e kuqe.
Në sfilatën e dytë për Stevenson vjeshtë/dimër 2017, Xhesika shfaqej me seksi dhe ekstravagante me fustanin me dekolte të hapur dhe aksesorët e veçantë, si varësja choker me gurë dhe vathi tek. Ky është një fillim i mbarë për bukuroshen shqiptare, e cila është shprehur se do të konkurrojë për t’u bërë pjesë e engjëjve të Victoria’s Secret. I urojmë shumë suksese!
