Vetëm në prill të kaluar 2025 u njoftua emërimi i Jonathan Anderson si drejtor i ri kreativ i Dior Homme, pas largimit të Kim Jones. Një njoftim që ishte përfolur prej kohësh dhe që më në fund mori konfirmim, edhe pse sipas shumëkujt nuk i përmbushi pritshmëritë plotësisht.
Disa mendonin se Dior do të zgjidhte një emër më të njohur, duke pasur parasysh suksesin që ka patur Anderson në vitet e fundit. Për të tjerë, ishte vetëm çështje kohe para se të konfirmohej ky emër. Parashikimi u bë realitet sot, më 2 qershor 2025, me emërimin zyrtar të Jonathan Anderson si drejtor kreativ i Dior, edhe për linjën e femrave (womenswear).
Pas largimit të Maria Grazia Chiuri më 29 maj, e cila la shtëpinë e modës pas 9 vitesh bashkëpunimi kreativ, Anderson do të jetë stilisti që do të marrë drejtimin e plotë të shtëpisë pariziene të modës – një simbol i luksit dhe haute couture që prej themelimit të saj në 1946 nga Christian Dior.
Debutimi i tij për linjën e meshkujve është planifikuar për qershorin, gjatë Javës së Modës në Paris të dedikuar për koleksionet për meshkuj. Ndërsa koleksioni i parë për femra do të prezantohet në tetor 2025.
Anderson merr një nga rolet më të rëndësishme në industrinë e modës. Ende nuk dihet se çfarë risish do të sjellë, por pritet të përçojë një vizion të ri për Dior, ndërthurur me minimalizëm, krijimtari, lehtësi dhe struktura arkitektonike që janë bërë karakteristike të stilit të tij.
Suksesi i tij dhjetëvjeçar në Loewe e rriti markën në nivele të reja popullariteti dhe dëshirueshmërie, falë mjeshtërisë artizanale, inovacionit dhe produkteve të zgjuara që patën shitje të larta.
