17 mijë euro duhej të mblidheshin për 10 ditë por kanë mjaftuar pak më shumë se 24 orë që shqiptarët të bëhen bashkë dhe të mbledhin shumën për të rikthyer në shtëpinë e saj mësuesen dhe aktivisten Ina Kasimati. Ajo është duke u përballur me një sëmundje të rëndë në një spital në Francë.
Prej vitesh, Ina Kasimati, mësuese e biologjisë por dhe një aktiviste në kauza të ndryshme, po lufton betejën më të madhe të jetës së saj, kancerin.
Zysha, siç e njohin shumë qytetarë, duke marrë në konsideratë dhe këshillat e mjekëve francezë, kishte nevojë që të kthehej në vendlindjen e saj në Vlorë, me një avion charter, pasi i duhet të qëndrojë e lidhur me aparaturat, që mundësojnë qëndrimin e saj në jetë.
Për këtë fluturim asaj i duheshin 17 mijë euro, ndërkohë që shuma e mbledhur në më pak se 24 orë, është dyfishuar. Në një shënim në GoFundMe, thuhet se paratë që do të mblidhen përtej shumës së 17 mijë eurove, do të shkojnë për nevojat shëndetësore që ajo do të ketë në Shqipëri, si dhe për të ardhmen e djalit të saj të mitur.
