Një kamping në Jalë është bllokuar nga Autoriteti Kombëtar i Ushqimit për kushte higjeno-sanitare jashtë standardeve.
Siç shihet në fotot e siguruara nga “Shqiptarja.com” në kuzhinën ku gatuhej shihet një ambient jo i pastër dhe jo i duhur për t’u ofruar ushqim pushuesve.
Ministri i Bujqësisë, Bledi Çuçi njoftoi se në kuadër të aksionit kundër informalitetit do të bllokohen hapësirat ku nuk u sigurohen pushuesve as kushtet minimale.
“Të gjithë ata që kanë dalë nga leja. Nuk ka as paralajmërim fare. I merret leja dhe nuk i jepet më. Ka filluar një fenomen i ri që nuk e kemi pasur më parë. Ngritja e kampingjeve në plazh. Është gjëja që në mënyrë kategorike duhet ndaluar. Për kampingje ka vende të caktuara sepse duhet të ketë disa kushte minimale. Edhe gjatë ditës duhet bërë një lloj disiplinimi se është ndotje e tmerrshme akustike. Ka norma edhe gjatë ditës se sa duhet të jetë zhurma”.
Ministri i Bujqësisë dhe Zhvillimit Rural theksoi se reagimi ndaj telefonatave të qytetarëve duhet të jetë i padiskutueshëm.
