Ditën e djeshme, Kryeministri Rama lajmëroi ndalimin e qarkullimit në fundjavë të automjeteve private dhe çdo lëvizje tjetër, ndërsa një pjesë e kryeqytetasve u dyndën për t’u larguar nga Tirana.
Sipas mjekut Pëllumb Pipero, ky është një gabim i madh që rrezikon shëndetin tonë.
Pipero shprehet se duhet të merren masa më të rrepta, pasi në të kundërt do të përfundojmë si Italia.
“Duhet të ketë masa edhe më drastike. Kur po vija këtu mora vesh që sot duke pasur frikë që nesër nuk mund të lëvizësh me qindra automjete kanë udhëtuar nga Tirana në drejtim të Korçës, nga Tirana në drejtim të Shkodrës, në drejtim të Lezhës për të bërë fundjavën. Besoj që kanë bërë apo po bëjnë një gabim shumë të rëndë dhe është gabimi të cilin bëri Italia në fazat e para të kësaj epidemie duke lejuar veriun të ikte në jug dhe u shpërnda në gjithë Italinë. Përmes jush bëj një thirrje tjetër, mirë që vajtën, por të bëhet një urdhër i prerë që nesër të mos hapet asnjë lokal, asnjë restorant, asnjë dyqan. Kanë bërë gabim, është gabim shumë i rëndë që bëhet në këtë situatë.”-u shpreh ai mbrëmë në “Opinion”.
Deri tani, numri i të infektuarve në Shqipëri ka shkuar në 23, ndërsa është shënuar edhe vdekja e parë në Durrës nga Covid-19.
