Sëmundja e fruthit është rikthyer në vendin tonë dhe gjendja duket alarmante. Pranë pavijonit të pediatrisë në QSUT janë shtruar 11 fëmijë, ndërsa pritet një reagim për të mësuar se nëse kemi të bëjmë ose jo me një rast epidemie.
Burime nga Ministria e Shëndetësisë e Mbrojtjes Sociale kanë bërë me dije se po presin rezultatet e analizave.
Të 11-të fëmijët e prekur nuk kanë qenë të vaksinuar. Disa prej prindërve nuk i kanë vaksinuar për shkak të besimit se me diçka të tillë do të shkelin fenë myslimane.
Mbi këtë çështje ka reaguar edhe Komuniteti Mysliman i Shqipërisë, i cili përmes një deklarate u ka kërkuar prindërve të vaksinojnë menjëherë fëmijët, pasi në asnjë libër të shenjtë nuk ndalohen barnat apo vaksinat për mbrojtjen e shëndetit.
Konsultoret e çdo lagjeje në kryeqytet kanë nisur të telefonojnë nënat e reja duke i kërkuar të sjellin fëmijët për vaksinim, për të shmangur sëmundjen, në rast të kundërt gjithçka që mund të ndodh më pas do të jetë përgjegjësi e prindërve.
Prindërit e foshnjave të prekura deri më tani, përveçse janë në ankth, kanë shprehur pakënaqësi edhe ndaj shërbimit të mjekëve.
