Një stuhi shiu dhe breshëri ka pushtuar ditën e sotme qytetin e Tiranës, e cila zgjati për thuajse 30 minuta. Reshjet intensive të shoqëruara edhe me erë të fortë në pak minuta e kanë shndërruar kryeqytetin në një Venecia të vërtetë.
Nga pamjet e publikuara nga “Top Channel” duken qartë rrugët e kryeqytetit të mbuluara me ujë, gjë që ka rritur edhe vështirësitë në qarkullim e automjeteve, duke krijuar kështu trafik në akset kryesore të Tiranës. Uji ka pushtuar rrugët duke vështirësuar qarkullimin në bulevardin “Dëshmorët e Kombit”, në bulevardin “Zogu I”, në rrugën e “Elbasanit” dhe në rrugën “Don Bosko”, ku kalimi ka qenë i pamundur për këmbësorët.
