Prej ditësh në Tiranë po përflitet për historinë e mistershme të 23-vjeçares, Evgjeni Baxho, që u gjet e pajetë në shtëpinë e saj. Fillimisht u raportua se e reja kishte ndërruar jetë pas një infeksioni në dhëmballë. Ngjarja ndodhi në mesditën e 18 majit në Tiranë, në lagjen Ali Demi në rrugën ‘Teodor Muzaka’. Baxho u gjet e pajetë në banesën ku jetonte me qira, pasi kishte ardhur në kryeqytet për të studiuar.
Mirëpo rrjedha e ngjarjes ndryshoi pasi grupi hetimor me ekspertin kriminalistik dhe mjekun ligjor vunë re në trupin e viktimës disa shkrime.
“Gjatë këqyrjes së vendit të ngjarjes është vënë re në trupin e kufomës, në pjesën e barkut një shkrim i panjohur, i bërë me lapostil me ngjyrë të kuqe nga kërthiza deri në pjesën e ezofagut. Po ashtu gjatë autopsisë në pjesën e shpinës së kufomës janë vërë re tre shkrime të tjera të panjohura, të bëra po ashtu me lapostil të kuq”, thuhej në dokumentin e Policisë Gjyqësore të siguruar nga “Top Channel”.
Ndërkohë sot janë publikuar fotot nga figurat e çuditshme që janë gjetur mbi trupin e të ndjerës. Disa media kanë siguruar fotot me imazhet e çuditshme, për të zbërthyer kuptimin e tyre. Në bazë të informacioneve të deritanishme rezulton se figurat e shkruara me lapostil të kuq në barkun e viktimës janë një bashkim i simboleve rune (naziste).
Kuptimi i tyre është:
Tiwaz, shigjeta që nënkupton nder, drejtësi dhe autoritet.
Odal, romb që nënkupton shtëpi, pasuri e trashëguar.
Algiz, pamje sfurku që nënkupton mbrojtje dhe shëndet.
Origjina e fjalës “rune” buron nga fjala gjermane “mister” dhe “sekret”. Ditët e sotme, simbolet rune përdoren si një metodë për t’u lidhur me versionin më të lartë të vetes, udhëzimin e brendshëm dhe si një metodë për parashikimin e së ardhmes. Gjithashtu thuhet se simbolet rune, historikisht janë përdorur për qëllime magjie. Megjithatë deri më tani nuk ka një shpjegim zyrtar për simbolet, pasi hetimet po vazhdojnë ende nga ekspertët.
