Misioni u përmbush me sukses! Mijëra shqiptarë anembane botës kanë arritur të vendosin Kosovën në hartën e Apple, pasi u mblodhën plot 197 mijë e 175 nënshkrime në peticionin “Put Kosovo on Apple Maps”.
Kosova tashmë është vendosur në hartat e Apple dhe lajmi i mirë është dhënë nga change.org ku edhe është nënshkruar peticioni.
Nismës për vendosjen e Kosovës në hartat e Apple, iu bashkuan shumë të famshëm, mes të cilëve Dua Lipa, Rita Ora, Dafina Zeqiri etj. Madje debati i vendosjes së Kosovës në hartë u përshkallëzua me debate politike kur Dua postoi një foto të Shqipërisë së madhe në Instagram, aty ku iu vërsulën ndjekësit serbë.
Fushatës për vendosjen e Kosovës në hartat e Apple iu bashkuan edhe politikanët kosovarë. Kryetarja e Kuvendit të Kosovës, Vjosa Osmani, u shpreh asokohe se aplikacionet e Apple janë zhvilluar në Kosovë, prandaj qartazi Kosova është pjesë e botës së Apple.
“Shumë nga aplikacionet tuaja në App Store janë zhvilluar në Kosovë, me shumë tjera që do të zhvillohen pasi ju i bëtë shërbimet tuaja të qasshme këtu. Apple, Kosova është qartazi pjesë e botës tuaj, të sigurohemi që të kemi mundësi ta shohim atë edhe në hartën tuaj”, kishte shkruar Osmani.
Ministrja e Punëve të Jashtme dhe Diasporës, Meliza Haradinaj-Stublla, bashkë me homologun e saj në Shqipëri, Gent Cakajn, i kishin dërguar një letër drejtorit ekzekutiv të Kompanisë Apple, z. Tim Cook, për t’i kërkuar marrjen e masave për të vendosur kufijtë e Kosovës në në shërbimin e Apple Maps.
Republika e Kosovës është njohur nga shumë shtete demokrate dhe shpallja e pavarësisë së Kosovës është në përputhje të plotë me ligjin ndërkombëtar.
Ky zhvillim është edhe një herë prova se bashkimi bën fuqinë!
/Iconstyle.al
