Ligji për masat kundër dhunës në familje ka pësuar sërish ndryshime. Në ndryshime e reja parashikohet se burrat që dhunojnë gratë do të dëbohen menjëherë nga banesat e tyre të përbashkëta.
Bëhet me dije se ky ligj do të hyjë në fuqi prej datës 18 nëntor të vitit 2020. Ndërkohë Gjykata, si masë mbrojtëse të dhunës në familje, me ndryshimin e ri të ligjit, parashikon urdhërimin e menjëhershëm të largimit të dhunuesit nga banesa për një afat kohor të caktuar, në situatat kur viktima dhe dhunuesi banojnë në të njëjtën strehë.
Në vendosjen e kësaj mase, Gjykata mund të marri në konsideratë nevojat e veçanta të dhunuesit të mitur, të moshuar ose personit me aftësi të kufizuar dhe në këto raste urdhri i largimit nga banesa vendoset vetëm kur asnjë masë tjetër nuk garanton mbrojtjen e viktimës nga dhuna.
Sipas ligjit të mëparshëm, burrat qëndronin në banesë deri në vendimin e gjykatës, kohë në të cilën vijonte sërish dhuna.
Ndryshimet ligjore parashikojnë që në urdhrin e mbrojtjes, të lëshuar me vendim gjykate, dhunuesi detyrohet të marrë pjesë në programe rehabilitimi psikosociale ose në programe të aftësimit prindëror, të organizuara nga subjekte publike ose private.
Ja si vepron policia në situata të jashtëzakonshme
Ndër të tjera në ligj theksohet se, policia duhet të veprojë në terren dhe të jetë e pranishëm në rastet kur ndodh dhuna dhe të lëshojë urdhër mbrojtje , edhe në atë kohë kur vendi është nën masa izoluese.
Pasi gjatë kohës së bllokimit të vendit, shuam gra dhe vajza janë përballur me dhunë në familje dhe nuk kanë gjetur zgjedhje. Madje sipas statistikave në periudhën e karantinimit dhuna në familje u shtua në përmasa të mëdha, prandaj qeveria ka ndërmarrë këtë vendim.
“Kur në të gjithë vendin ose në një pjesë të territorit të tij janë vendosur masat e jashtëzakonshme, përkatësisht, titullari i strukturës përgjegjëse të Policisë së Shtetit detyrohet të lëshojë urdhrin për masat paraprake për mbrojtjen e menjëhershme, sipas pikës 2 të këtij neni, në çdo rast kur konstaton se është ushtruar dhunë.
Gjatë gjithë periudhës së zgjatjes së masave të jashtëzakonshme, në kërkesën drejtuar gjykatës për vlerësimin e masave paraprake të mbrojtjes, të marra përmes urdhrit për masat paraprake për mbrojtjen e menjëhershme të lëshuar, policia duhet t’i kërkojë gjykatës lëshimin e urdhrit të mbrojtjes, pa kërkuar paraprakisht nxjerrjen e urdhrit të menjëhershëm të mbrojtjes”, theksohet në vendim.
Rehabilitimi i dhunuesit
1.
Në urdhrin e mbrojtjes, të lëshuar me vendim gjykate, urdhërohet dhunuesi të marrë pjesë në programe rehabilitimi psikosociale dhe/ose në programe të aftësimit prindëror, të organizuara nga subjekte publike ose private.
2.
Përgjegjësit e programit të rehabilitimit raportojnë përpara koordinatorit vendor për referimin e rasteve të dhunës në marrëdhëniet familjare, pjesëmarrjen e të paditurit në program dhe ecurinë e tij, në mënyrë periodike dhe rezultatet e rehabilitimit të dhunuesit.
Nëse dhunuesi nuk merr pjesë në program, përveç rasteve kur ka arsye objektive dhe shkaqe të përligjura për mospjesëmarrjen, me kërkesë të mbledhjes ad-hoc të Mekanizmit të Koordinuar të Referimit të rasteve të dhunës në familje ose të subjekteve të parashikuara nga neni 13 i këtij ligji, zbatohen dispozitat e Kodit Penal për veprime të kryera në kundërshtim me vendimin e gjykatës për urdhrat e mbrojtjes.
3.
Në urdhrin e mbrojtjes, të lëshuar me vendimgjykate, urdhërohet i padituri ose dhunuesi, nëse është rasti, të marrë pjesë në programe rehabilitimi pranë qendrave spitalore, qendrave ambulatore ose qendrave komunitare, që japin shërbime të shëndetit mendor, shërbime të alkoologjisë ose shërbime të toksikologjisë.
4.
Përgjegjësit e programit të rehabilitimit vënënë dijeni koordinatorin vendor pranë Mekanizmit të Koordinuar të Referimit të rasteve të dhunës në familje për pjesëmarrjen e të paditurit në program dhe ecurinë e tij.
5.
Një dhunues, i dënuar me vendim gjykate përtë kryer dënimin në institucionet e ekzekutimit të vendimeve penale, mund të marrë pjesë në programe rehabilitimi psikosociale.
Pjesëmarrja dhe bashkëpunimi në program mbahet parasysh në vlerësimin e rrezikut të të dënuarit në rastet e lirimit./Iconstyle.al/
