Gjatë gjithë këtyre ditëve të protestës, studentët i kanë kërkuar ministres së Arsimit, Lindita Nikolla që të dalë në bulevard dhe të pranojë kërkesat e saj.
Ata vazhdimisht dëgjohen teksa brohorasin: “Lindita Nikolla dil në bulevard, Shkolla është e jona, Jo biznes privat”
Dhe gjatë paradites, ministrja e Arsimit ndodhej në një aktivitet dhe kur i sugjeruan që të dilte në bulevard tek studentët e të dialogonte me ta, ajo u shpreh se nuk mundet për shkak të moshës:
“Ju doni që të jem atje në mes dhe atë do e bëjmë. Edhe pse ndoshta një grua 53 vjeçe, ndonjë të shtyrë… sharjet kështu..do ndihesha keq. Mendoni kam vajzën më të madhe se ju. Shaka kjo! Ju nuk keni asnjë arsye të besoni ministren kur e thotë, keni të drejtën e Zotit të jeni kritik dhe dyshues.
Hajde të ulemi. Çfarë thonë studiuesit për koston reale. Sa paguhet? Sa është buxheti? Po investojmë tek rrugët të kemi zhvillim. Të kemi më shumë buxhet për ministrinë e arsimit apo do ti lëmë rrugët dhe të tjerat. Ftesa ime është shumë e sinqertë. Jam e dëshiruar ta nisim bisedën por ju deri në fund dyshues. Hajde të ftojmë njerëzit e dijes, që dinë si bëhen llogaritë e të thonë si është e vërteta. Kostoja reale për të formuar një student të Tiranës është 94 mijë lekë”.
Protesta e studentëve është në ditën e katërt dhe do të vijojë sot deri në përmbushjen e tre kërkesave të tjera që kanë mbetur, përgjysmimin e tarifave të shkollimit, rritje të buxhetit për universitetet dhe kushte më të mira në konvikte.
