Ministria e Shëndetësisë ka dhënë detaje në lidhje me vitkimën e parë të Koronavirusit në Shqipëri.
Në një dalje për mediat, zv.ministrja Mira Rakacolli u shpreh se e moshuara nuk mundi t’u bëjë ballë komplikacioneve që lindën nga sëmundjet nga të cilat vuante prej kohësh.
73-vjeçarja vuante nga sëmundja kronike e mushkërive, kishte çrregullime të zemrës dhe kishte kryer Bypass kardiak.
Gjendja e saj u përkeqësua dhe u vendos transferimi i saj drejt Tiranës, por nuk mundi të kryhej dot në kohë.
“Nuk mundi të mbijetojë si pasojë e komplikaconeve nga sëmundjet që vuante prej vitesh. Kishte çregullime të ritmit të zemrës, sëmundje kronike të mushkrive, kishte patologji të tiroideve dhe kishte kryer Bypass kardiak. Pavarësisht përpjekjeve për ta mbajtur në jetë, nuk mundi të mbijetojë. Është trajtuar në mënyrë të izoluar në spitalin e Durrësit. Është kërkuar paradite transferimi në Tiranë, por kur po merreshin masat të transferohej, gjendja e saj u përkeqësua”.
Zv/ministrja ritheksoi se ky virus prek kryesisht moshat e mëdha dhe ato që vuajnë nga sëmundjet kronike.
“U bëjmë thirrje edhe një herë qytetarëve që të bashkëpunojnë me stafet mjekësore. Kush ka një histori udhëtimi të vetëkarantinohet, t’i kufizojmë lëvizjet sa më shumë të jetë e mundur”, tha ajo.
Sa u përket mjekëve që kanë qenë në kontakt me të moshuarën, ata janë vetëkarantinuar dhe po priten analizat nëse janë pozitivë apo jo!
