Ditën e sotme, gjatë mbledhjes së Task-Forcës për masat e marra nga koronavirusi, Ministrja e Shëndetësisë Ogerta Manastirliu është shprehur se nuk ka asnjë rast të konfirmuar me koronavirus në vendin tonë.
Ministrja tha se deri tani janë testuar 18 raste të dyshuara me Covid-19, mirëpo të gjitha kanë rezultuar negative.
Manastirliu bëri gjithashtu të ditur se ditën e sotme ka nisur shpërndarja e 1.2 milion maskave kirurgjikale për të gjitha strukturat spitalore ne vend.
“Shqipëria nuk mund të jetë imune ndaj një rreziku si koronavirusi, por jemi bashkë për të bërë më të mirën e mundshme. Deri më tani nuk ka asnjë rast të konfirmuar, janë testuar 18 persona, që rezultojnë negativë.
Dua të ndaj me ju faktin që përveç mjeteve të mbrojtjes për higjienën personale dhe stokut në strukturat spitalore, tani që flasim ka nisur puna për të shpërndarjen e 1.2 milion maskave kirurgjikale në të gjitha strukturat e vendit, të parësorit dhe në spitalet e vendit.
1 milion dollarë janë alokuar në buxhetet e spitaleve të vendit për të pasur stokun e mjaftueshëm për çdo skenar potencial për masat mbrojtëse personale, me fokus spitalin Nënë Tereza dhe Shefqet Ndroqi, e për gjitha spitalet në vend.”- është shprehur Manastirliu.
Burimi: Tv Klan
