Prej 2 vitesh, Tuna nuk është aktive në muzikë dhe të gjithë e kemi ndjerë mungesën e saj. Kënga e fundit që ajo ka publikuar është “Amoni”, që u lançua në tetor të 2019-s. Por duket se nuk do të na duhet të presim dhe shumë, sepse Tuna është gati të rikthehet sërish në muzikë.
Ditën e sotme ajo ka publikuar në Instagram një foto, në të cilën shihet duke punuar në një studio muzikore. Në foton shfaqen bashkëpuntorët e Tunës, që duket se po punojnë për projektin e saj të ri muzikor. Këngëtarja nuk ka dhënë detaje më tepër, por me shumë mundësi kënga e re nuk do të vonojë edhe shumë.
Para 2 ditësh, Tuna festoi ditëlindjen me zemrën të mbushur plot. Ajo ndau në rrjete sociale një foto me dy djemtë e saj në Instagram pa asnjë lloj mbishkrimi, por duke nënkuptuar se këtë vit ndihet më e lumtur se kurrë e përmbushur plotësisht si nënë e dy fëmijëve.
Ndërkohë, urimin e parë publik për ditëlindjen e saj, Tuna e mori nga Dafina Zeqiri. Kjo e fundit publikoi foton e Tunës me djemtë dhe në kokë i vendosi një kurorë ku shkruhej: “Jeta është e mirë”.
“Gëzuar ditëlindjen zemër”, shkroi Dafina përkrah fotos së Tunës.
Kujtojmë se kohë më parë, për shumë vite më radhë Tuna dhe Dafina janë cilësuar si armike të njëra-tjetrës. Dy artistet bënë namin në 2010 me super bashkëpunimin e famshëm me 2PO2, “Vibe” që pati mjaft sukses.
Mirëpo, diçka ndodhi mes tyre dhe më pas dy këngëtaret u tha se nuk flisnin me njëra-tjetrën dhe kjo për shkak të disa deklaratave të Dafinës, ose përgjimeve në telefon të një bisede ku ajo vinte në pikëpyetje talentin e Tunës dhe e quante atë njeri me dy fytyra.
Gjërat mes tyre u dukën që nuk ishin ok, kur Tuna zhduku pjesën e refrenit të Dafinës në këngën “Vibe”, duke e modifikuar nëpër koncerte.
Megjithatë, zjarri mes tyre u shua në 2018, kur bënë paqe dhe postuan një foto me njëra-tjetrën në SHBA. Më pas në emisionin “NIN”, Dafina sqaroi se raportet mes tyre janë të mira, duke nënkuptuar se i kanë kërkuar ndjesë njëra-tjetrës. Ndërkaq, para disa muajsh u raportua se vajzat do të sillnin një duet së bashku, por deri më tani nuk kemi asnjë informacion mbi këtë projekt të këngëtareve.
