Gent Cakaj, një emër i panjohur për publikun shqiptar, u zgjodh nga kryeministri Rama një javë më parë si ministër i ri për Europën e Punët e Jashtme, për të zëvendësuar Ditmir Bushatin.
Por ditën e sotme, Presidenti Ilir Meta vendosi që të refuzonte dekretimin e tij. Ai e argumentoi vendimin e tij duke thënë se Cakaj nuk i plotëson kushtet, për shkak se nuk janë provuar aftësitë e tij në pozicione të larta drejtuese të kësaj fushe.
“Kandidatura e Gent Cakaj nuk i plotëson kushtet, nuk krijon besueshmëri dhe nuk ofron garancitë e nevojshme për ushtrimin me objektivitet dhe në lartësinë e kërkuar të detyrës tepër të rëndësishme të ministrit për Evropën dhe Punët e Jashtme. Në këto kushte, Presidenti i Republikës, në përmbushje të detyrimeve kushtetuese si Kreu i Shtetit, si Kryetar i Këshillit të Sigurisë Kombëtare dhe rolit të rij specifik kushtetues në politikën e jashtme të shtetit shqiptar, refuzon propozimin tuaj për emërimin e Gent Cakaj në detyrën e ministrit për Evropën dhe Punët e Jashtme të Republikës së Shqipërisë”, thuhet në letrën që kreu i shtetit iu drejtuar Ramës.
Menjëherë pas këtij vendimi vjen edhe reagimi i kryeministrit, i cili i quan skandaloze argumentet e Metës. Mes të tjerash Rama i kërkon ndjesë Kosovës duke e cilësuar atë që shkruhet në letrën e presidentit si “turp”.
“Refuzimi i Presidentit për dekretimin e Ministrit të ri për Europën e Punët e Jashtme, është jo vetëm antikushtetues, po edhe i turpshëm. Argumentet e dhëna nga zoti President janë të frikshme për nivelin skandaloz dhe turpëruese për institucionin. Ndjesë Kosovës për këtë turp”, shkruan Rama.
