Plagosja e menaxherit të artistëve Met Elshani sot gjatë të shtënave me armë zjarri në lagjen Dardania, duket se nuk ka patur pasoja serioze.
Drejtuesi i kompanisë së menaxhimit “On Records”, foli publikisht në lidhje me ngjarjen duke u shprehur se nuk i njeh personat që e kanë sulmuar dhe as motivet që i kanë shtyrë.
“Kanë qenë disa persona të panjohur të cilët as nuk më kanë folur as asgjë vetëm më kanë sulmuar. Nuk i njoh personat nuk i di motivet dhe asgjë tjetër. Ata kanë qenë të rinj, dhe rinia tashmë kanë devijuar në një mënyrë sepse e kanë lënë shkollë prapa dhe janë duke u marrë me disa punë se si të vijnë tek fama dhe te paraja. Po besoj që do të kthehen në rrugë të drejtë”, u shpreh ai për “Insajderin”.
Policia arrestoi katër të rinj: Adhurim Lepaja, Leutrim Krasniqi, Shpëtim Çakiqi, këta të rinj të moshave 20- 22 vjeç, si edhe një burrë me inicialet Gj. B, 43 vjeç.
Sot paradite, Met Elshani u përfshi në një sherr të armatosur, duke marrë dy plumba në këmbë. Sipas mediave të Kosovës, pjesë e përleshjes ishin edhe disa nga të rinjtë miq me reperin Fero, të cilin Elshani e ka nën menaxhim.
Vitin e kaluar, Fero u sulmua nga disa të rinj në parkingun e një qendre tregtare në Prishtinë.
Të rinjtë që e sulmuan ishin disa reperë të rinj, ndër të cilët edhe Ligrit Uka, me të cilin më pas pati një takim pajtimi.
