Plot 36 të rinj amerikanë u betuan sot në Ambasadën Amerikanë për të punuar dy vjet si vullnetarë të Korpusit të Paqes në Shqipëri.
Ata kanë mbërritur prej janarit dhe kanë jetuar në 3 fshatra të Elbasanit, ku edhe kanë ndjekur mësime për gjuhën shqipe, janë njohur me kulturën dhe traditat tona si dhe janë trajnuar për 10 javë me radhë.
Ndërkohë, gjatë kësaj jave të rinjtë janë takuar me homologët e tyre, mësues dhe profesorë të shkollave shqiptare anembanë Shqipërisë, në një konferencë që u mbajt për 3 ditë në kryeqytet.
Sot 36 amerikanë u betuan për të shërbyer në ceremoninë e 22-të të Vullnetarëve të Korpusit të Paqes. Të veshur me kostume popullore, ata kënduan shqip dhe kërcyen valle shqiptare dhe bënë betimin për t’u angazhuar me punë për 2 vite në trojet shqiptare.
Ceremonia u mbikqyr nga e Ngarkuara me Punë e Shteteve të Bashkuara në Shqiperi, Leyla Moses-Ones, e cila administroi betimin dhe nga Drejtoresha e Korpusit të Paqes në Shqipëri, Kate Becker, e cila udhëhoqi vullnetarët në zotimin e tyre ndaj shërbimit.
Ndërkohë, duke filluar nga java e ardhshme, të rinjtë do të fillojnë të punojnë me bashkitë, organizatat e komunitetit dhe shkollat në të gjithë Shqipërinë, përfshi këtu: Konispolin, Delvinën, Ndroqin, Kamzën, Linin (Pogradec) etj.
Gjatë periudhës dyvjeçare të qëndrimit në Shqipëri, të rinjtë nuk duhet të lëviznin nga vendi që u është caktuar për të jetuar për një periudhë 3-mujore. Gjithashtu ata e kanë të ndaluar të krijojnë lidhje romantike si dhe mjekimet për të cilat kanë nevojë do të sigurohen vetëm nga korpusi.
Burimi: Iconstyle.al
