Dy ditë pasi nxori vendimin për hapjen e shkollave në shtator, Ministria e Arsimit, ka publikuar edhe udhëzimin për mënyrën sesi do të kryhet mësim në kushte pandemie!
Udhëzimi mbështetet mbi një protokoll rregullash tepër të cekëta, mes të cilave, thuhet se kur është e mundur do të praktikohet edhe mësimi jashtë shkolle, pra në oborr.
Respektimi i distancës në klasa, kërkon përgjysmim të numrit të nxënësve, dhe ndonëse Ministria bëri me dije se kjo do të çojë në mësimin me dy turne, tashmë zgjidhja e radhës është mësimi jashtë në qiell të hapur.
“Iconstyle.al” e ka shprehur prej kohësh shqetësimin se hapja e shkollave në këtë periudhë pandemie është me të vërtetë një rrezik për nxënës, mësues, dhe prindër. Sado e rëndësishme të jetë hapja e shkollave, në kushtet kur qeveria nuk siguron as ambientet e nevojshme për mësim, ky është një vendim i nxituar.
Ja çfarë thotë udhëzimi më konkretisht:
Hyrja dhe dalja nga ambientet e institucionit:
–Orari dhe hyrjen në institucionet të arsimit rregullohet sipas një grafiku nga drejtoria
-Nxënësit paraqiten në institucionin arsimor duke respeketuar me përpikmëri orarin
-Nxënësit hyjnë në institucionin arsimor pasi janë vendosur në radhë në largësi nga 1.5-2 metra.
-Nxënësi që ka simptoma të ngjashme apo temperaturë përpara ardhjes së institucion, njofton mësuesin ose personin përgjegjës për çëshjet shëndetësore
-Nuk lejohet që nxënësit të dalin nga godinës dhe të rikthehen përsëri në të, brenda ditës
Qëndrimi dhe mësimi në klasa:
-Gjatë procesit mësimor, pedagogu qëndron në klasë duke respektuar distancimin social dhe fizik me nxënësit dhe mësuesit 2 metra
-Brenda klasës nxënësit qëndrojnë të ulur në banka të paktën 1.5 deri në 2 mera larg njëri-tjetrit. Në klasat që nuk është e mundur, nxënësit duhet të ndahen në klasa të tjera.
-Mësuesit sigurohen që në klasë të gjithë të jenë të pajisur me maskë dhe ti mbajnë rregullisht ato.
-Kur është e mundur praktikohet mësimi në ambient të hapur (oborri i institucionit) duke i respektuar largësinë dhe rregullat e mësipërme.
-Nuk lejohet ushqimi në klasë.
Hapja e shkollave u bazua tek sondazhet e papërfunduara dhe pakënaqësia e nxënësve me mësimin online të karantinës!
Aksesi në internet, që jo gjithkush e ka, ngarkesa e madhe, mungesa e gjithëpërfshirjes, programe jo efektive ku ka shkëputje, lodhja e mbingarkesa etj, janë disa nga arsyet për pakënaqësinë e madhe që u krijua pas karantinës për mësimin online. Kjo u shfrytëzua nga Ministria e cila e mbështeti vendimin për hapjen e shkollave pikërisht në pakënaqësinë që krijoi vetë me dështimin e mësimit online.
Madje sipas gazetës “SI”, vendimi për hapjen e shkollës se gjoja “kështu duan shqiptarët” është bazuar në një sondazh të papërfunduar i kryer nga Drejtoria e Përgjithshme e Arsimit Parauniversitar drejtuar nxënësve, prindërve dhe mësuesve.
Besa Shahini tha se sipas sondazhit, 87% e pjesëmarrësve mendojnë se “duhet të kthehemi në shkollë në fillim të vitit shkollor dhe vetëm 13% duan kushte shtëpie”. Por burimet nga Ministria e Arsimit i thanë gazetës “Si” se nuk mund të flitet saktësisht për të dhënat e këtij sondazhi, pasi përfundimet e tij ende nuk janë kalkuluar.
Vendimi i ministrisë për hapjen e shkollave pa një plan të qartë e konkret për respektimin e rregullave anti Covid, erdhi pas rritjes së presionit të publikut për të mësuar se çfarë do të ndodhë me mënyrën e organizimit të mësimit.
Të pakënaqur nga mësimi online i karantinës, që rezultoi të ishte një dështim, prindër e nxënës urojnë që mësimi të bëhet në shkolla, por dyshimet për kapacitetin e lartë të nxënëseve në klasa, mundësitë e kufizuara për të mbajtur higjenën si dhe rastet precedente të shpërthimit të virusit në çerdhe, bashki e gjykata, na bën tepër skeptikë në këtë drejtim! A jemi gati të hapim shkollat?
Të njëjtin veprim të nxituar ndërmori edhe qeveria e Izraelit (lexo këtu), ku rihapja e shpejtë e shkollës çoi në një kolaps në të gjithë vendin. Një muaj pas rihapjes, gati gjysma e infeksioneve të reja të vendit mendohej se kishin origjinën nga shkollat.
/Iconstyle.al
