Ilir Meta
Presidenti i zgjedhur Ilir Meta, i shoqëruar nga bashkëshortja e tij, Monika Kryemadhi ka votuar në qendrën e tij të votimit në kopshtin 31 në kryeqytet.
I pyetur lidhur me arrestimet për vjedhjen e votës, Meta tha se liria dhe dinjiteti nuk ka çmim. “Të votojnë kundër kujtdo që bëjnë presion për votën e tyre, kundër kujtdo që kërkon të blejë të ardhmen e tyre sepse sot shqiptarët duhet të tregojnë dhe do të tregojnë që liria dhe dinjiteti i tyre është gjëja më e shenjtë për ta. Sot në këtë ditë të shenjtë për të gjithë. Liria dhe dinjiteti i tyre nuk ka çmim, e ardhmja e tyre nuk ka çmim”, tha Meta.
Ndërsa zonja Kryemadhi tha se ky është momenti për të shprehur dëshirën dhe kërkesat, “padrejtësitë që u janë bërë përmes votës”.
Edi Rama
Kryeministri Edi Rama, i shoqëruar nga bashkëshortja e tij, Linda Rama, ka votuar në qendrën e tij të votimit në shkollën e Surrelit.
“Ju uroj të gjitha motrave, të gjithë vëllezërve të fesë islame, gëzuar Bajramin! Qoftë një ditë e bukur kjo për Shqipërinë dhe qofshin njerëzit e zakonshëm sot, Zoti që i duhet Shqipërisë. Unë jam shumë besimplotë se do të kemi një ditë shumë të bukur”, tha kreu i Partisë Socialiste.
Lulzim Basha
Kryetari i PD, Lulzim Basha ka votuar paraditen e së dielës në qendrën e votimit në çerdhen numër 13, në njësinë numër 8 të kryeqytetit, ku dhe është rritur.
“Sot është dita kur vendosim me votë, kur merret vendimi nga qytetarët për qytetarët. Ndaj iu drejtohem atyre, mos mungoni në këtë ditë të madhe. Vetëm përmes votës mund të ndryshohet shqipëria dhe jeta juaj. Këtë mesazh e kam për ata qytetarë që nuk shohin shpresë në vendin e tyre. Vetëm me votën tuaj mund të ndryshoni jetën tuaj. Ndaj mos mungoni ditën e votimit, kur do vendosni për 4 vitet e ardhshme. Askush nuk duhet të ndihet i përjashtuar nga kjo garë. Ejani të arrijmë etapën e qytetarisë europiane përmes pjesëmarrjes masive”, ka thënë Basha./TCH
