Pas bllokimit të pjesshëm një-mujor, kancelarja Angela Merkel dhe zyrtarët e tjerë gjermanë nuk janë të mirëpritur në ‘Standige Vertretung’, një lokal i famshëm në Berlin që shërben për klasën politike.
Ka qenë kjo mënyra që pronarët e këtij lokali kanë zgjedhur për të shprehur zemërimin ndaj vendimit të kancelares për të mbyllur pjesërisht aktivitetet me qëllim ngadalësimin e përhapjes së Covid-19.
Jon Peter Brinkmann dhe Jan Philipp Bubinger e kanë bërë publike këtë lajm përmes një videoja në Facebook, duke e konsideruar kancelaren dhe bashkëpunëtorët e saj përgjegjës për futjen e masave shtrënguese që synojnë frenimin e përhapjes së koronavirusit.
“Dihet që shumë politikanë vijnë tek ne si mysafirë. Disa nga ata politikanë kanë vendosur dje të mbyllin përsëri bizneset e hotelierisë, për të na ndaluar të bëjmë punët tona. Ne po i shtojmë ata politikanë në listën tonë të zezë menjëherë, ” thanë bashkë-pronarët, Jorn Peter Brinkmann dhe Jan Philipp Bubinger.
Përveç Merkelit, ndër zyrtarët e tjerë që nuk do të lejohen janë zëvendëskancelari Olaf Scholz, kryetari i Bashkisë së Berlinit Michael Muller, drejtuesi i landit të Bavarisë Markus Soder dhe Senatori për Shëndetësinë Dilek Kolat.
