E njohur gjerësisht si Paloma, gazetarja Rudina Demneri rrëmbeu ndër vite vëmendjen mediatike, përmes pyetjeve ngacmuese, deklaratave therëse dhe përplasjeve me figura të njohura drejtuese. Diçka që e bën ende sot, të thënit gjërat troç, pa filtra.
E ftuar mëngjesin e sotëm në emisionin “Wake Up” në Top Channel, Paloma u rrëfye mbi misionin e saj në terren, aty ku shënohen shpesh dialogje të bujshme. Ndër të tjera, Demneri rrëfeu një nga situatat më të sikletshme, atë me Fatos Nanon. Gazetarja e pyeti dikur, në prani të gruas se kur do të kryenin së bashku marrëdhënie seksuale, pyetje kjo e stisur nga stafi.
“Unë për shembull i thashë Fatos Nanos: A do bëjmë seks bashkë? Ndërkohë që kishte bashkëshorten aty”, tregon Rudina Demneri. “Dhe nuk e di, për një moment mendova se aty erdhi fundi, do haja ndonjë shuplakë ose nga ai ose nga ajo. E kisha të stisur pyetjen, sigurisht, jo se doja të shkoja vërtetë me të”.
Po cili ishte qëllimi i pyetjes në fjalë?
“Doja ta ftoja në një takim pijesh, sepse thuhej se Fatos Nano pinte shume alkool dhe ne donim të dinim nëse është e vërtetë kjo ose jo. Dhe unë fillova ta ngacmoja”, kujton Paloma.
