Ditën e sotme, “Iconstyle.al” vuri re se llogaria në Instagram e reperes Rina Balaj kishte ndërruar emër dhe po përdorej nga labeli ku ajo bënte pjesë, “On Records”.
Faqja po promovonte emrat e rinj që po bëheshin pjesë e “On Records”, ndërsa të gjithë u bëmë kuriozë të dimë ç’po ndodh me Rinën.
Mesa duket, fansat e saj të shumtë kanë kontaktuar menaxherin e reperes, Met Elshanin, i cili ka dhënë një njoftim lidhur me Rinën në Instastory.
Meti ka njoftuar se largimi i Rinës nuk është i përkohshëm, pasi ajo është larguar jo vetëm nga “On Records”, por ka lënë edhe muzikën.
“Po shoh shumë reagime nga fansat e Rinës, me këtë shkrim po ju njoftojmë se Rina me dëshirën e saj e ka lënë muzikën dhe se nuk është pjesë e On Records. Sa i përket Instagramit është pronë e Onrecords me kontratë. Faleminderit për mirëkuptimin.”- shkruan menaxheri i saj.
Ndërkohë, nuk kemi ende asnjë reagim nga vetë reperja, e cila që prej mbylljes së rrjeteve sociale nuk ka më asnjë kontakt me fansat e saj.
