Dukesha e Sussex, Meghan Markle në datën 4 gusht feston ditëlindjen e saj. Kjo është ditëlindja e parë e saj si pjesëtare e pallatit mbretëror dhe të gjithë janë kuriozë të zbulojnë detajet se si do ta festojë ajo këtë ditëlindje.
Deri më tani nuk dihet ndonjë detaj, i vetmi informacion është që atë ditë ajo do të jetë e pranishme në dasmën e njërit prej miqve të Princit Harrry, në një vend në juglindje të Anglisë.
Mirëpo ndërkohë që na ndajnë edhe dy ditë nga ditëlindja e shumëpritur Meghan ka marrë edhe dhuratën e parë. Organizata për të drejtat e kafshëve “PETA”, i ka dhuruar Meghan-it një çantë lëkure vegane nga marka e njohur “Alexander K”.
Drejtoresha e kësaj organizate ka thënë për revistën “OK” se kjo nuk ka qenë një zgjedhje e rastësishme, por e menduar shumë mirë. Sipas saj kjo është dhurata perfekte për Meghan, e cila është vegane dhe kujdeset për kafshët dhe mjedisin.
Dukesha Meghan përveçse vetë ndjek një dietë vegane, së fundmi po mundohet të bindë edhe Princ Harry-n që të konsumojë sa më pak mish.
