Një video amatore është publikuar sot pak orë pas vrasjes që ndodhi në “Don Bosko”, ku 31-vjeçari Xhaferr Mata qëlloi me pistoletë Xhuljeta Çunin, vajzën 19-vjeçare që kishte qenë e dashura e tij.
Vajza ishte nisur për në shkollë kur Mata i doli para me pistoletë në dorë dhe e kërcënoi duke i thënë se e kishte ndarë nga familja dhe nga fëmija: “Më ndave nga familja, më ndave nga fëmija, më shkatërrove jetën”. Çifti i kishte dhënë fund lidhjes pak muaj më parë ndërsa mësohet se Xhaferr Mata kishte dhe një djalë me martesën e parë.
Vajza ka qenë duke ecur, kur është përballur me 31-vjeçarin. Ai ka tentuar ta ndalë, ajo i ka kërkuar mos ta prekë, sapo është kthyer në kurriz, ai e ka qëlluar nga pas, më pas ka drejtuar armën tek kalimtarët:
“Mos kini frikë nuk ju bëj gjë”, ka thënë ai dhe ka qëlluar mbi të, si dhe ka qëlluar kur ajo ka qenë e shtrirë në tokë se ishte ende gjallë.
Në këto pamje të siguruara nga Tv Klan shihet se si 31-vjeçari nga Kukësi, me profesion inxhinier, që mban veshur një bluzë të kuqe, lëshon pistoletën në trotuar, pasi e ka qëlluar dy herë të renë, që gjendet e shtrirë në trotuarin e rrugës “Eshref Frashëri”, pak metra larg tij.
Disa sekonda më pas ai rrethohet nga policia, në anën tjetër të rrugës. Thirrjeve për t’u dorëzuar iu përgjigj duke qëlluar veten me një plumb në kokë. U dërgua në spital, por disa minuta më vonë ndërroi jetë.
