Ilir Shaqiri së fundmi ka sqaruar deklaratën e tij që bëri xhiron e rrjetit, ku ironizoi ish-banorët duke thënë “Unë kur shikoj intervista hajvanësh”.
“Nuk është problemi për kë, sepse e kam patur në përgjithësi. Gjëra tendecioze dhe të pavërteta kam dëgjuar gjithë kohës. Me hajvanlliqe unë nënkuptoj një gamë shumë të gjerë. Kjo fjalë përfshin ato që dëgjova nga disa banorë nëpër intervista duke u shprehur rreth disa gjërash që nuk kanë ndodhur ose ata thjesht i kanë imagjinuar. Siç kanë imagjinuar edhe brenda shtëpisë. Si brenda, si jashtë njeriu është ai që është. Nëse ne përballemi me një publik për 24 orë, në fund do të dalë fytyra jote.”- është shprehur ai në A-Show.
Ndër të tjera, gjatë intervistës Iliri ka thënë se nuk e sheh veten në politikë. Edhe pse pranon se arti është i lidhur me politikën, ai vetë nuk planifikon të bëhet pjesë e saj.
“Unë jam artist. Me politikë nuk kam dëshirë të merrem. Unë thjesht jam për artin dhe për punën. Ndonëse unë mendoj se arti është i lidhur me politikën, si të gjitha fushat e jetës. Ai moment që unë po jetoj është shumë i bukur. Qëllimit tim ia arrita: Të tregoja kush isha.”- deklaroi balerini.
Nëse për politikën nuk është i interesuar, a mendon ai të marrë pjesë në “Grande Fratello VIP” në Itali? Mundësit ekzistojnë. Madje Iliri tha është duke folur për tu bërë pjesë e tij por, ende nuk e ka vendosur nëse do marrë apo jo pjesë.
“Grande Fratello nuk e kam ndjekur shumë. Njoh shumë artistë që kanë qenë pjesë e tij. Unë sot isha duke folur për të marrë pjesë. Nuk është një ide që më çmend nga gëzimi sepse atë që doja e arrita. Të bashkëjetosh katër muaj me bashkëkombasit e tu dhe ta bësh këtë gjë me njerëz që nuk janë shqiptarë janë dinamika të ndryshme.”
