Pas Ditës së Verës, një tjetër ditë është planifikuar të quhet si “Dita pa Makina”.
Kreu i Bashkisë së Tiranës, Erion Veliaj, gjatë një takimi të organizuar nga ambasada hungareze për promovimin e teknologjisë në mirëmenaxhimin e qyteteve tha se ndotësit kryesorë të ajrit të Tiranës janë makinat.
Kryebashkiaku tha se Bashkia e Tiranës do të ndjekë ato politika mjedisore që nxisin sa më pak lëvizje me makina.
Kjo është arsyeja pse në Tiranë do të shtohen edhe ditët pa makina, duke filluar nga 5 maji.
“Kjo na ndihmon në vendimmarrje dhe kjo është arsyeja pse duam që çdo muaj të bëjmë një ditë pa makina. Dita e ardhshme pa makina, pas Ditës së Verës, do të jetë 5 Maji. Është e diel, qëllon që është Dita e Dëshmorëve, është një mundësi fantastike për të lënë makinat, për të nderuar ata që luftuan për këtë vend, por edhe për t’i dhënë kohë Tiranës të ventilohet. Sepse qyteti është si një shtëpi: nëse ka njerëz pa fund, që kanë ngrënë, kanë pirë, kanë fjetur, kanë kryer nevojat personale, duhet të hapësh dritaret, të ajroset shtëpia. Unë besoj se duke trajtuar qytetin si një shtëpi, edhe me konceptet smart city, kemi nevojë të caktojmë ditët që do ajrosim shtëpinë”, sqaroi Veliaj.
