Drejtoresha dhe një sanitare e Kopshtit nr 41 në Tiranë, mësohet se kanë rezultuar pozitive me koronavirus.
Si pasojë kopshti është mbyllur, duke zbatuar kështu protokollet udhëzuese anti-covid, dhënë nga Ministria e Shëndetësisë dhe Instituti i Shëndetit Publik (ISHP).
Bëhet me dije se kopshti do të qëndrojë i mbyllur deri në një afat të caktuar, ndërsa epidemiologët po vijojnë punën për gjurmimin e kontakteve që mund të kenë pasut të dy të infektuarat në institucionin parashkollor.
Kujtojmë se ditën e djeshme, Ministria e Shëndetësisë në buletinin ditor të rasteve të reja, raportoi për 4 humbje jete dhe 171 raste të reja në 24 orët e fundit.
Për shkak të situatës së pandemisë fëmijët parashkollorë, nxënësit e ciklit të ulët dhe të lartë 9-vjeçar, si dhe ata të gjimnazeve, janë të detyruar të respektojnë një udhëzues të ri të nxjerrë nga Ministria e Shëndetësisë. Ky udhëzues cakton rregullat se si duhet të veprojnë brenda në ambientet arsimore nxënësit, mësuesit dhe pjesa tjetër e stafit në kushtet e Covid-19.
Në fakt udhëzuesi i Ministrisë së Shëndetësisë është mjaft i cunguar, pasi një pjesë e madhe e rregullave nuk janë shpjeguar qartë.
Në të thuhet se nëpër klasa dhe nëpër institucionet parashkollore, nxënësit duhet të ruajnë distancën me të paktën 1.5 metër dhe se duhet të ulen nga një person në bankë. Por sa e mundur është kjo gjë në shkollat dhe hapësirat e tjera arsimore në vendin tonë?
Në të njëjtin sondazh nga Iconstyle, 62% e nxënësve thonë se në shkollat e tyre nuk plotësohen kushtet për të ndjekur mësimin në kohë pandemie. Në institucionet tona arsimore edhe kur koronavirusi nuk ekzistonte ka pasur mungesë klasash e bankash, ndaj nuk dihet nëse Ministria e Arsimit ka marrë masa për të siguruar mjaftueshëm tavolina për të gjithë nxënësit.
Për më tepër në shumë prej tyre ka mungesë uji të rrjedhshëm dhe sapuni, ndërkohë që në udhëzues shkruhet se strukturat arsimore duhet të kujdesen për këtë gjë, por se sa do të realizohet pritet ta shohim.
Gjithashtu në po të njëjtin udhëzues thuhet se nxënësit e një klase duhet të përdorin vetëm tualetin që ndodhet në korridorin e klasës së tyre, pa u takuar në asnjë moment me persona të tjerë. Në të gjitha shkollat e Shqipërisë nga një tualet është në dispozicion për çdo kat, ose në disa raste të tjera ka nga vetëm 1 të tillë, ndaj është e pamundur që nxënësit t’i përmbahen këtij rregulli.
Duke pasur parasysh që shkollat tona nuk plotësojnë as kushtet më minimale për ruajtjen e distancës dhe mbajtjen e higjienës, përbën një rrezikshmëri shumë të lartë rikthimi i nxënësve në ambientet e tyre. Për këtë arsye në sondazhin tonë 53% e nxënësve thonë se duhet të shtyhet patjetër hapja e shkollave në këtë periudhë.
Deri më tani qeveria as që e mendon diçka të tillë, ndaj tashmë na mbetet vetëm të shpresojmë që numrat e të infektuarve me Covid-19 mos të kapërcejnë në shifra të paimagjinueshme pas hapjes së institucioneve të arsimit parashkollor, parauniversitar dhe universitar./Iconstyle.al/
