Dita e sotme (3 tetor) ka shënuar vizitën e parë të përbashkët të Mbretit Charles III dhe bashkëshortes së tij Camilla në publik, pas vdekjes së Mbretëreshës Elizabeth II. Çifti mbretëror vizituan Skocinë.
Turma të mëdha dolën në rrugët e Dunfermline në Fife, në veri të Edinburgut, me shpresën për të takuar nga afër Mbretin e tyre të ri. Charles, kaloi disa minuta duke shtrënguar duart me dashamirësit pasi përshëndeti ministrin e parë skocez Nicola Sturgeon dhe zyrtarë të tjerë.
Çifti mbretëror ndodhej në Skoci për t’i dhënë zyrtarisht statusin e qytetit Dunfermline, vendlindjes së një mbreti tjetër Charles: Charles I, i cili mbretëroi në shekullin e 17-të para ekzekutimit të tij, dhe ishte monarku i fundit britanik i lindur në Skoci.
Dunfermline ishte ndër vendet që fituan statusin e qytetit si pjesë e festimeve të Jubileut Platinum për të shënuar 70 vjetorin e Mbretëreshës Elizabeth në fron.
Pas kësaj ngjarje, Charles dhe Camilla do të organizojnë një pritje për rreth 300 të ftuar në Edinburg për të festuar komunitetin britanik të Azisë Jugore. Familja mbretërore do të takohet me indianët britanikë, pakistanezët dhe shumë të tjerë dhe do të nderohen për kontributet që kanë dhanë në Mbretërinë e Bashkuar.
Charles u ul në fron menjëherë pas vdekjes së nënës së tij Elizabeth në kështjellën Balmoral, Skoci, më 8 shtator. Britania mbajti 10 ditë zie kombëtare, ndërsa familja mbretërore e zgjati periudhën e zisë për një javë pas funeralit të mbretëreshës më 19 shtator.
