Shijojeni këtë fundjavë kohën e mirë, sepse nuk dihet se kur do të rikthehet sërish.
Edhe kjo fundjavë do të vijojë të karakterizohet nga mot i kthjellët e me diell deri në mesditën e së dielës dhe pas kësaj, gjithçka do të ndryshojë. Do të hyjmë zyrtarisht në vjeshtë. Sipas meteorologëve, një sistem vranësirash vjen nga veriperëndimi dhe do vendoset gradualisht deri në mbrëmjen e së dielës mbi të gjithë territorin. Orët e natës sjellin shira fillimisht në veriperëndim dhe gradualisht shirat do të përfshijnë të gjithë vendin.
Kështu, sipas “Meteoalb”, e hëna, pritet të jetë me shira, ndërsa në mbrëmje parashikohen reshje dëbore në ekstremin verior dhe zonat e thella malore të verilindjes. Temperaturat e ajrit do të ulen gradualisht deri mesditën e së hënës kur pritet rënie e ndjeshme e tyre duke zbritur maksimumet termike sipas zonave në vlerat 13 – 17°C zonat malore; 18 – 21°C zonat e ulëta dhe 19 – 20°C bregdeti.
Era do të fryjë e lehtë dhe mesatare deri mbrëmjen e së dielës kur pritet forcim i erës mbi 40 km/h nga drejtimi veriperëndimor. Natën e së dielës dhe gjatë së hënës, vijon forcimi i erës mbi 60 km/h nga drejtimi verior – veriperëndimor duke gjeneruar në brigjet detare dallgëzim 4 ballë, por mbi 6 ballë, në det të hapur.
