Maturantët që kanë mbetur pa u regjistruar në universitet, kanë afat deri në fund të muajit për fazën përfundimtare të kalimit në universitet.
Raundi i tretë dhe i fundit është ajo që quhet faza e lirë, që nis më 28 tetor dhe përfundon pas 4 ditësh pra më 31 tetor.
Arjan Xhelaj, Kreu i Rrjetit Akademik Shqiptar është shprehur për Top Channel se, maturanët që nuk u regjistruan përgjatë tre fazave të këtij raundi, kanë mundësinë që nga sot, të paraqiten pranë fakulteteve, dhe në ato lista ku ata janë në pritje për regjistrim, të shprehin dëshirën për të nisur studimet.
“Fakultetet i mbledhin kërkesat me shkrim të aplikantëve, për ato degë ku janë të interesuar dhe më pas nxjerrin një shortlist, që nuk bëhet më publike në portalin U Albania, por bëhet publike para fakultetit. Pastaj caktohet një ditë për regjistrim brenda kësaj faze 4 ditore, dhe në atë ditë, maturantët do të paraqiten pranë atij fakulteti”, është shprehur ai.
Pas datës 31 tetor ezaurohen kuotat e fundit në universitetet publike dhe private të vendit. Në universitetin e Tiranës në fakultetin Juridik p.sh. ka ende 6 kuota të lira.
“Maturanti shkon pranë fakultetit juridik, dhe sekretaria mban shënim të gjithë ata maturantë që duan të vazhdojnë garën. Pastaj nxjerrin një listë të shkurtër duke respektuar renditjen që kanë patur maturantët, në fillim të raundit të trete. Në bazë të renditjes ato bëjnë regjistrimin në datën 30 ose 31 tetor”, shton Arjan Xhelaj.
Mbi 21 mijë maturantë nisën vitin e ri akademik. Në këto 4 ditë pritet të regjistrohen rreth 200 maturantë të tjerë.
/Top Channel
