Kreu i opozitës italiane, Matteo Salvini ka publikuar një foto pas vizitës në ishullin e Lampedusa-s, që është kthyer në pikën e zbarkimit të qindra migrantëve nga Afrika e Veriut.
Përveç kapeleve të rojes bregdetare italiane, kreu i Lega Nord mban pranë vetes edhe qeleshen shqiptare.
Qeleshja është zbukuruar me shqiponjën dhe mbishkrimin “Albania”.
Ndërkohë, këtë foto Salvini e shoqëron me një mesazh: “Italia dashurohet, mbrohet e kufijte ruhen”.
Autoritetet italiane kanë bërë thirrje që qeveria shqiptare të bëjë kujdes në gjurmimin e rasteve, teksa pati debate se mund të anulohen fluturimet mes dy vendeve.
Guvernatori i Toscana-s Enrico Rossi është shprehur i shqetësuar për shpërthimet e fundit të virusit në qytetin italian, ku nga 16 raste të reja me Covid-19 të regjistruara në buletinin e përditshëm të Toscana-s, 13 persona kanë shkuar nga Shqipëria, në veçanti nga Tirana, dhe një rast tjetër është një shtetas i Ekuadorit.
Pas kësaj ai kërcënoi me mbyllje kufijsh, por Ambasada shqiptare në Itali, përmes një postimi në Facebook ka lënë të kuptohet se fluturimet nuk janë anuluar teksa ka publikuar udhëzimet sesi mund të udhëtohet nga Shqipëria drejt Italisë.
Në njoftim theksohet se duhet të firmoset vetëdeklarimi, i cili përmban disa pika kryesore, deklarimi se nuk kanë qenë të infektuar me Covid-19, apo të karantinuar për 14 ditë.
Gjithashtu, qytetarët duhet të nënshkruajnë deklarimin se nuk kanë temperaturë mbi 37.5.
/GazetaReforma
