Niveli i ndotjes së ajrit në Tiranë është alarmant për shëndetin e qytetarëve. Në këtë përfundim arrin, profesori Besnik Baraj, anëtar i Akademisë së Shkencave, i cili prezantoi në emisionin ‘Të Paekspozuarit’, disa matje nga grimcat që qëndrojnë pezull në ajër dhe depërtojnë në enët tona të gjakut.
Këto grimca konsiderohen nga OBSH si më të rrezikshmet dhe shkaktojnë sëmundje të rënda si hemoragjitë cerebrale, kanceri, infarktet, etj.
Matjet në mjediset e lokaleve pranë rrugëve kryesore të Tiranës, tregojnë prezencën e grimcave nga 33.6 në 92.6 mikrogram/m3, shumë herë më e lartë se vlera e rekomanduar nga OBSH, 5 mikrogram/m3.
Në qendrat tregtare në vendet e parkimit vlerat arrijnë në nivele kritike, deri në 352 mikrogram/m3, nga norma 5 mikrogram/m3.
Shifrat tregojnë se Tirana është jo vetëm një qytet i pajetueshëm për shkak të kaosit dhe ndërtimeve, por edhe për shkak të ndotjes në nivele alarmante. Dhe shifrat rrëzojnë propagandën e Veliajt që flet për një qytet më të pastër.
Matjet tregojnë se Tirana nuk është ai qyteti që Veliaj mundohet të “shesë” por një kryeqendër që dalëngadalë mbyt qytetarët, dhe kjo ndodh edhe për shkak të politikës që ndjek një kryebashkiak, që mburret me leje ndërtimi dhe gënjen për pyjet orbitale dhe miliona pemë të mbjella.
“Këto matje i kam kryer nga ora 08:00 e mëngjesit deri në 10:00 të mëngjesit, në objektet ku njerëzit ulen buzë lokaleve. Ishte ditë e thatë. Vlerat janë shumë të mëdha. Janë shumëfish nga rekomandimi i OBSH”, tha Baraj në Të Paekspozuarit.
Profesori Baraj, i ka bërë matjet edhe në orët e para të mëngjesit, ku ka qarkullim minimal të mjeteve dhe grimcat janë sërish në nivele alarmante. Vlerat e matura në 15 stacione të Tiranës, nga ora 03:00-05:00, variojnë nga 31.7 – 78 mikrogram/m3. Pra në asnjë rast më e vogël se 5 mikrogram/m3, që është norma e OBSH.
Për të bërë një krahasim me disa metropole shumë më të zhvilluara se Tirana. Ditën e sotme në Londër niveli i PM 2.5 ka qenë 13 mikrogram/m3. Në Neë York ka qenë 4.2 mikrogram/m3. Në Romë ka qenë 12.7 mikrogam/m3. Në Paris ka qenë 16 mikrogram/m3 dhe në Berlin ka qenë 11.1 mikrogram/m3. Ndërsa matjet e Tiranës që ka kryer zoti Baraj, tregojnë shifra shumë më të larta, nga 33-92 mikrogram/m3.
Baraj i ka kryer matjet me një aparat i cili e ka marzhin e gabimit deri në +/- 10%. Edhe po t’ua heqësh vlerave këtë përqindje, shifrat e ndotjes në Tiranë nga grimcat vdekjeprurëve, janë në nivele shumë shqetësuese, ndërkohë kryebashkiaku i Tiranës u ka rekomanduar qytetarëve, që nuk u pëleqejnë ndërtimet dhe ndotja, që “të shpërngulen në fshat”.
